سەردانەکەی میری قەتەر بۆ ئێران و ئەورووپا بە ئامانجی هەوڵدانە بۆ زیندووکردنەوەی ڕێکەوتنی ناوەکی و ئاسایشی وزە لە ئەورووپا.
ئاژانسی ڕۆیتەرز ڕایگەیاند کە شێخ تەمیم بن حەمەد ئالی سانی، میری قەتەر، ئەم هەفتەیە سەردانی هەر یەک لە وڵاتانی ئێران، ئەڵمانیا و بەریتانیا و وڵاتانی دیکەی ئەورووپی دەکات.
سەرچاوەیەکی ئاگادار بە ئاژانسی ڕۆیتەرزی ڕاگەیاندووە کە میری قەتەر هەوڵەکان بۆ زیندووکردنەوەی ڕێکەوتنی ناوەکی ئێران و هەروەها ئاسایشی وزەی ئەورووپا تاوتوێ دەکات.
میری قەتەر سەرەتا سەردانی تاران دەکات و پاشان سەردانێکی چەند ڕۆژەی بۆ وڵاتانی ئەورووپی دەبێت.
ڕاشیگەیاندووە کە تەوەری سەرەکیی وتووێژەکانی شێخ تەمیم تایبەتە بە دۆخی ڕاگیراوی دانوستانەکانی ڤیەننا و هەروەها ناردنی گازی ناوچەکە بۆ ئەورووپا.
وتەبێژی وەزارەتی دەرەوەی ئێرانیش پشتڕاستی کردووەتەوە کە میری قەتەر سەردانی ئەم وڵاتە دەکات./.
