ڕوانگە - وتەبێژی یەکێتی رایدەگەیەنێت، بۆ بەهێزكردنی پێگەی هەرێم و دامەزراوەكانی پێویستە هەڵبژاردن ئەنجام بدرێت.
سەعدی ئەحمەد پیرە، وتەبێژی یەکێتیی نیشتیمانیی کوردستان لە كۆنگرەیەكی رۆژنامەوانیدا، رایگەیاند، ئەو دۆخەی دروست بووە، هیچ هۆکارێکی دیاریکراوی نییە و تەنها نیشاندانی هێزە و درەنگ و زوو بێت هەر هەڵبژاردن دەکرێت و چەند زووتر بکرێت بۆ خۆمان و هەرێمەکەمان باشترە.
باسی لەوەشكرد، هەرێمی کوردستان رێزی زۆری لێدەگیرێت لەسەر ئاستی نێودەوڵەتی و پێگەیەکی بەهێزی هەیە و پێویستە ئەو پێگەیە بە پارێزراوی بمێنێتەوە و هەڵبژاردن بەڕێوەبچێت.
وتەبێژی یەكێتی لەبارەی "راپۆرتەكەی خەبات"قسیەیكرد و دەڵێت، راپۆرتەکەی خەبات چەواشەکارییە و راست نییە و لە جێگەی ئەوەی لە رێگەی رۆژنامەیەکەوە چاوساغی بۆ تورکیا بکرێت، دەکرێت دانیشتن بکرێت و رێککەوتن بکرێت و حکومەتی هەرێم پێشوەختە بڵێت بۆچی کارێکی وا دەکرێت و لێپرسینەوە بکات.
سەعدی پیرە جەختیشی كردەوە، یەکێتی هەست بە بەرپرسیارێتی دەکات چ لە نیشتمانی و نەتەوەیی و نابێت بە دووژمنی هیچ لایەنێک لە ناوخۆی کوردستان و، رێگەش نادرێت هەرێمی کوردستان بۆ هێرشکردنە سەر وڵاتانی دیکە بەکاربهێندرێت.
راشیگەیاند، یەکێتی رێز لە بڕیارەکانی دادگای فیدراڵی دەگرێت و ئاماژەی بەوەشکرد، دەکرێت بڕیار هەبێت بەدڵمان نەبێت یاخود بەدڵمان بێت، بەڵام رێز لەو دادگایە دەگرین و خۆمان دروستمان کردووە. تەمەنی پەرلەمان 32 ساڵە و لەوە دەرچووە پێی بوترێت ساوایە و فەریکە،
ئاماژەی بەوەشکرد، پێویستە دامەزراوە تەشریعی و تەنفیزییەکان و سەرجەم دامەزراوەکان لە هەرێمی کوردستان بپارێزین،وتەبێژی یەكێتی وای وت.
لەبارەی کێشەکانی یەکێتی و پارتیشەوە سەعدی پیرە وتی، “ئێمە داوامان کردووە وەزارەتەکانی پێشمەرگە و ناوخۆ دەستکاری نەکرێن و، هەر رۆژە و بەڕێوەبەرێک و بەرپرسی یەکێتی لانەبرێت و رێگری لە کارەکانی نەکرێت”.
