ڕوانگە - وەزیری كشتوكاڵی هەرێم رایدەگەیەنێت، لەگەڵ بەغداد لێكتێگەیشتنی باش هەیە لەسەر ئەوەی هاوشێوەی پارێزگاكانی ناوەڕاست و خوارووی عێراق گەنمی جووتیارانی هەرێم وەربگیرێت.
بێگەرد تاڵەبانی، وەزیری كشتوكاڵ و سەرچاوە ئاوییەكانی هەرێم رایگەیاند، بەمەبەستی وەرگرتنی گەنمی جووتیاران لەلایەن وەزارەتی بازرگانی و وەزارەتی كشتوكاڵی عێراق، ئەمڕۆ سەدانی بەغدادمان كرد.
ئاماژە بەوەش دەكات، لەگەڵ وەزیری كشتوكاڵ و تیمی هونەریی وەزارەتی كشتوكاڵی عێراق كۆبوونەوە و دواتر لەگەڵ لیژنەی 57 كۆبوونەوەیان تایبەت بە بڕیاردان لەسەر چۆنییەتی وەرگرتنی گەنم كردووە و گفتوگۆی لەسەر مافی جووتیارانی هەرێمی كوردستان كرا لە چوارچێوەی هەموو ئەو رێكارانەی كە ئەمساڵ گیراونەتەبەر بۆ سەلماندنی راستی و دروستی داتا و زانیارییەكانی جووتیارانی هەرێم، تاوەكو بەهەمان شێوەی پارێزگاكانی ناوەڕاست و خوارووی عێراق بەرهەمی گەنمەكەیان رادەستی سایلۆكان بكەن.
بێگەرد تاڵەبانی دەشڵێت، دوای گفتۆگۆیەكی زۆر لە نێوان هەردوولاماندا تارادەیەك لێكتێگەیشتن هەبوو، بەڵام تاوەكو ئێستا نەگەیشتووینەتە قۆناغی كۆتایی بڕیاردان لەسەر چۆنییەتی وەرگرتنی گەنم.
