ڕوانگە- لە لێداونێکی ڕۆژنامەوانیداجێگری سەرۆکی ئەنجوومەنی ئاسایشی ڕووسیا ڕایگەیاند، جەنگی ئۆکرانیا زۆری نەماوە و بەم زووانە کۆتایی دێت و دەرئەنجامەکەیشی ئاشکرا دەبێت.
ئەمڕۆ یەکشەممە، ٢٠٢٥/٢/٢٣، دیمیتری میدڤیدیڤ، جێگری سەرۆکی ئەنجوومەنی ئاسایشی ڕووسیا، لەبارەی جەنگی نێوان وڵاتەکەی و ئۆکرانیا، ڕایگەیاند "جەنگەکە بەم زووانە کۆتایی دێت وهەروەها کات سەلماندوویەتی ئۆپەراسیۆنی تایبەت لەنێو ئۆکرانیا تاکە چارەسەری گونجاوی بەردەستمان بوو.
وتیشی"جەنگ کۆتایی نەهاتووە، بەڵام دەرەنجامەکەی زۆر نزیک بووە" دووپاتیشی کردەوە، وڵاتەکەی "هەموو دوژمنەکانی لەنێو دەبات."
لەبارەی لێکەوتەکانی جەنگی ڕووسیا و ئۆکرانیا لەسەر بەشەکانی دیکەی جیهان، میدڤیدیڤ ئاماژەی بەوەشکرد"مۆسکۆ ڕێگە بە ڕوودانی ململانێیەک نادات کە ببێتە هۆی کۆتاییهاتنی جیهان."
جێگری سەرۆکی ئەنجوومەنی ئاسایشی ڕووسیا، چەند ڕۆژێک لەمەوبەر، ڤۆلۆدیمێر زێلینسکی، سەرۆکی ئۆکرانیای بە "مشکێکی گیرخواردوو" ناوبرد و ئاماژەی بەوە دا، هەموو کارێک دەکات تاوەکوو لێکنزیکبوونەوەی ئەم دواییەی نێوان ڕووسیا و ئەمەریکا تێک بدات.