ڕوانگە - چوارچێوەی هەماهەنگی شیعەکانی عیراق کۆبونەوەیەکی نائاسایی بۆ تاوتوێکردنی دوا پەیامی ئەمریکا کە ئاراستەی بەغدای کردوە ئەنجام دەدات و سەرکردەیێکی ئەو لایەنە جەخت لەسەر ئەوە دەکاتەوە ئەوان وەک هەڕەشەیەکی راستەوخۆ بۆ سەر سیستمی حوکمڕانی لەعیراق مامەڵە لەگەڵ ئەو پەیامە دەکات.
دوابەدوای پەیوەندییە تەلەفۆنیەکەی نێوان محەمەد شیاع سودانی سەرۆکوەزیران و مارکۆ رۆبیۆ- وەزیری دەرەوەی ئەمریکا کەتیایدا واشنتۆن بەغدای لەسنوردارکردنی هەژمونی ئێران لەم وڵاتە ئاگادار کردوەتەوە، چوارچێوەی هەماهەنگی کۆبوونەوەیەکی نائاسایی سەبارەت بەناوەرۆکی پەیوەندیە تەلەفۆنیەکە ئەنجام دەدات.
عودەی خەدران، سەرکردە لەچوارچێوەی هەماهەنگی شیعەکان بەرۆژنامەی شەرقلئەوسەتی راگەیاندوە"ئەوان وەک هەڕەشەیەکی راستەوخۆ بۆ سەر سیستمی حوکمڕانی لەعیراق مامەڵە لەگەڵ دوا پەیامی ئەمریکا دەکەن هەربۆیە بەم نزیکانە کۆبونەوەیەکی نائاسایی ئەنجام دەدەن".
ئەو کۆبونەوە چاوەڕوانکراوەی چوارچێوەی هەماهەنگی لەکاتێکدایە، ئیدارەی ترەمپ بەنیازە سزا بەسەر ١٠ سەرکردەی حەشدی شەعبی و سێ کۆمپانیایی دارایی و سێ کۆمپانیای گواستنەوەی عیراقی بسەپێنێت کە تێوەگلاون لە فرۆشتنی نەوت و دابینکردنی داهاتی دارایی بۆ ئێران.