قاسم ئەعرەجی: ئەحمەد شەرع چەکداری ئەلقاعیدە و داعش بووە و "دەستی بە خوێنی عێراقییەکان سوورە"

 

شەوی رابردوو قاسم ئەعرەجی، راوێژکاری ئاسایشی نەتەوەیی عێراق لە چاوپێکەوتنێکی تەلەڤیزیۆنیدا لەگەڵ میدیایەکی عێراقی رایگەیاند، "ئەحمەد شەرع دەستگیرکراوبوو، ئەو چەکداری ئەلقاعیدە و داعش بوو، دەستی بە خوێنی عێراقییەکان سوورە، ئەو شتەش لەلای ئێمەدا نییە کە دەڵێن خوا لە تاوانی پێشوو دەبوورێت."

 

رۆژی هەینی 21ی شوباتی ئەم ساڵ، نووسینگەی راگەیاندنی وەزارەتی دەرەوەی عێراق رایگەیاند، "بە فەرمیی بانگهێشتی ئەسعەد شەیبانی، وەزیری دەرەوەی سووریامان کردووە بۆ سەردانیکردنی عێراق، ئەوەش بە مەبەستی تاوتوێکردنی چەند دۆسیەیەکی هاوبەش و کردنەوەی لاپەڕەیەکی نوێ لە پەیوەندییەکانی هەردوو وڵات. بەڵام کاتی سەردانەکە دیاری نەکراوە."

 

راوێژکاری ئاسایشی نەتەوەیی عێراق دەڵێت، "بانگهێشتی ئەسعەد شەیبانی، وەزیری دەرەوەی سووریا کراوە، بەڵام لەسەر داوای خۆی ئەو سەردانە دواخراوە."

 

قاسم ئەعرەجی باسی بوونی هێزەکانی تورکیای لەنێو خاکی عێراق و هەرێمی کوردستان کرد و گوتی، "تورکیا 100 بنکەی لەنێو خاکی عێراق هەیە، بەڵام هیچ بڕیارێک و هاوئاهەنگییەکی عێراقی نییە کە رێگە بە بوونی هێزەکانی تورکیا بدات لە خاکی عێراق، هێزەکانی تورکیا لە 1995ـەوە لە خاکی عێراقدان لە هەرێمی کوردستان و ئەوە نوێ نییە، بوونی ئەو هێزانە بە بیانووی پەکەکەیە، بەڵام بە رەزامەندی و هاوئاهەنگیی بەغدا نییە."

 

سەبارەت بە پەیامەکەی ئۆجەلانیش گوتی، "ئەو پەیامەی عەبدوڵڵا ئۆجەلان بڵاویکردەوە، ئێمە وەکو حکومەتی عێراقی پێشوازیمان لێکردووە، پاڵپشتیی دانانی چەک و هەڵوەشاندنەوە دەکەین، هانی پەکەکە دەدەین بڕیارەکەی بەڕێز ئۆجەلان جێبەجێ بکات، چونکە ئەوکات تورکیا هێزەکانی بۆ ئەودیو سنوور دەکشێنێتەوە، ئەگەر پەکەکە هەڵوەشایەوە ئەوکات ئێمە گفتوگۆ لەگەڵ تورکیا دەکەین بۆ پرسی کشانەوەیان لە سنوورەکان."

 

راوێژکاری ئاسایشی نەتەوەیی عێراق، دۆخی ئەمنیی عێراق بە سەقامگیر پێناسە دەکات، دەنگۆکان بۆ ئەگەری روودانی کودەتا بە دوور دەزانێت و دەڵێت، "بە بوونی حەشد کودەتا روونادات."

 

قاسم ئەعرەجی گوتیشی، "من حەشد و بەدریم و شانازیی پێوە دەکەم، لە 2014وە من حەشدی و بەدریم، بەڵام ئێستا هیچ چالاکییەکم لەگەڵیاندا نییە."