ڕوانگە ـ مەسعود بارزانی لە ٣٤ ساڵ یادی ڕاپەڕینی ئایاری  ١٩٩١ دا ڕایگەیاند، "راپەڕین لە دژی دامودەزگەی ستەمکار و داگیرکەر، پەیامێکی روون بوو کە سەرباری بوونی زوڵم و سەرکوتکاری و تۆقاندن، گەلی كوردستان زیندووە و ئازادی و سەربەستی دەوێت".

لە ڕاگەیەنراوێکدا مەسعود بارزانی ڕایگەیاند؛" بە بۆنەی سی و چوارەمین ساڵیادی راپەڕینە مەزنەكەی گەلی كوردستان پیرۆزبایی لە خانەوادەی سەربەرزی شەهیدان و پێشمەرگە قارەمانەكان و هەموو خەباتگێڕ و ئازادیخواز و نیشتیمانپەروەران و سەرجەم خەڵكی كوردستان دەكەم".

باسی لەوەەشکرد، "راپەڕین یەکێکە لە سەروەری و دەستکەوتە گرانبەهاکانی گەلی کوردستان. لە سایەی ئیرادەی ئازادیخوازیی گەلی كوردستان و قارەمانێتی پێشمەرگە و یەكڕیزیی لایەنەكانی ناو بزووتنەوەی رزگاریخوازی كوردستاندا راپەڕین هاتەدی و سەركەوتنی بەدەست هێنا. راپەڕین لە دژی دامودەزگەی ستەمکار و داگیرکەر، پەیامێکی ڕوون بوو کە سەرباری بوونی زوڵم و سەرکوتکاری و تۆقاندن، گەلی كوردستان زیندووە و ئازادی و سەربەستی دەوێت. راپەڕین ئەو راستییەی سەلماند كە داگیركاری و ستەم چەندە بەهێزیش بن، سەرئەنجام هەر كۆتایی دێت و ئەوە ئیرادە و هێزی گەلی كوردستانە كە براوە دەبێت".

لەە ڕاگەیەراوەکەدا مەسعود بارزانی باسی لەوەشکرد ، "لەو یادە پیرۆزەدا جەخت لە بەها پیرۆزەكانی راپەڕین و پەیامی ئاشتی و برایەتی و پێكەوەژیانی گەلی كوردستان دەكەینەوە. سڵاو بۆ رۆحی بەرزی شەهیدانی راپەڕین و هەموو شەهیدانی خەباتی رزگاریخوازی كوردستان دەنێرین، کە بە خوێنی پاكیان ئازادی و سەربەستیان بۆ گەلەكەمان هێنایە دی".