روانگه - وێنەی گولەبارانکردنی گەنجان بەدەستی دەسەڵاتە نوێیەکەی جۆلانی، وێنەگەلێکی تەواو خەمگین و تاقەتپڕوکێنن. لە سەرەتاوە پێمان وابوو گەنجێکی تیرۆریست بەسەر ماتۆڕێکەوە ئەستەمە بتوانێت سوریای پڕ لە جیاوازی بەرێوە ببات.
سوریا پێشتر لەسایەی دەسەڵاتێکی خوێنڕێژی بەعس و ئیستاش لە ژێر دەسەڵاتی گەنجێکی کۆنە قاعیدە و دەست و پەنجە سور بە خوێنی خەڵکی ئازادیخواز، ئەستەمە ئومێدی لەسەر هەڵبچنرێت.
هەر لە سەرەتاوە پشتیوانی ئیسلامییەکانی هەرێمی کوردستان لە دەسەڵاتەکەی جۆلانی بەرگرییەکی کوێرانە بوو، بەرگری لە پیاوێکی تیرۆریست، تەنها هەڵوێستێک نییە، بەڵکو ڕاستییەکیشە چ هێزگەڵێکی ترسناک لە کوردستانی عیراقدا بوونیان هەیە و لە ئیستاوە دەمامکی تیرۆرستی و نانیشتیمانییان هەڵدایەوە.
بەرگریکردنی برادەرانی بزوتنەوەی ئیسلامی و کۆمەڵی دادگەری و بەرگری عەلی قەرەداخی لە جۆلانی و بانگەوازی سەڵاحەدین بەهادین بۆ چەکدانانی برا کوردەکان لە ڕۆژئاڤا، نمونەیەکی تەواو کورتبین و ناسیاسی و نانیشتیمانی ئیسلامییەکانی لای خۆمانە.
سەیرکەن چەندین ساڵە خوشک و برا کوردەکانمان لە رۆژئاڤا چەکیشیان بەدەستە و دەسەڵاتیشیان هەیە، بەڵام نەمانبینی کەس بە بێتاوان بکوژن و نەمانبینی گەل و نەتەوە و زمانە جیاوازەکانی ژێر دەسەڵاتی برا کوردەکانمان هیچ گلەیی و گازندە و نیگەرانییەکیان هەبێت.
ئەو مۆدێلە جوانەی ڕۆژئاڤا جێگەی شانازییە بۆ هەمووان و مۆدێلی سێ مانگی توندڕەوی ئیسلامی سیاسی هەزارانجار شایەنی نەفرەت و ڕەتکردنەوە و قێزلێبوونەوەیە.