ڕوانگە - لە وتوێژی لەگەڵ پەیامنێری ڕوانگە، لەبارەی گرنگی ڕێککەوتنەکەی نێوان هەسەدە و سەرۆکی سوریا و هەروەها ئاڵانگاریەکانی بەردەم ڕێککەوتنەکە، دکتۆر عەدالەت عەبدوڵا نوسەر و چاودێری سیاسی ڕایگەیاند؛" ئەگەر سەرنج بدەی لە ئێستادا مەسەلەی هەڵوێست وەرگرتن لە ڕێککەوتنەکە بابەتێکە و شیکاری بۆ دەقی ئەو ڕێککەوتنە و ئەگەرەکانی جێ یەجێ کردنۑ یاخود جێ بەجێ نەکردنی شتێکی دیکەیە، واتە گۆشەنیگا شتێکە و شیکاریش شتێکی دیکەیە."
وتیشی؛"سەبارەت بە گۆشەنیگا واتە لەڕووی بیروباوەڕەوە هەموو کەسێک پێی خۆشە کە سوریا وڵاتێکی سەقامگیربێت و لەو چوارچێوەیشدا کورد بە مافە دەستووریەکانی خۆی بگات و لە دەستووردا حەقی سیاسی و دەستووری بۆ بچەسپێنرێت، ئەمە بابەتێکی بەڵگە نەویستە، بەڵام ئێمە وەکو نوسەران و ڕۆژنامەنووسان ئەوەمان بەلاوە گرنگە کە چاودێری وردی چۆنێتی جێ بەجێ کردنی ئەم ڕێککەوتنە بکەین، چونکە بێگومان تەحەدایەکی گەورەیە بۆ قۆناغی ئێستای سوریا و هەمیش بۆ ڕۆژئاوای کوردستان، بۆیە تێڕوانینی ئێمە یاخود شیکاری ئێمە ئەوەیە کە ئەو ڕێککەوتنە لەڕووی مەبدەئییەوە گرنگە، بەڵام جێ بەجێ کردنەکەی ئاسان نییە و پێویستی نەک بە تەنها بە دیاریکردنی کاتەوە هەیە، بەڵکو پێویستی بە پاڵپشتی و چاودێریکردنی نێودەوڵەتی هەیە و ڕێگەگرتنیش لە هەەموو دەستتێوەردانێکی هەرێمایەتی کە بەشێوەیەکی سلبی بکرێت لە چۆنێتی جێ بەجێ کردنی بەندەکانی ناو ڕێککەوتننامەکە."
دکتۆر عەدالەت عەبدوڵا ڕونیشیکردەوە؛"ئەمانە کۆمەڵێک بەربەرەکانین کە لە ڕێگەی ڕێککەوتنەکەدان یاخود دەکەوێتە سەر ئەندازەی سەربەخۆی بڕیاری سیاسی لە دیمەشق، ئەگەر لە دیمەشق سەربەخۆی و بڕیاری سیاسی بەهێزبێت وە گوێ لە دۆستانی سوریای نوێێ بگیرێت کە بێگومان بەشێکی زۆری وڵاتانی دونیا سوریای نوێیان قبوڵە ئەگەر توانای کۆکردنەوەی هەموو پێکهاتەکانی هەبێت لەناو پرۆسەی سیاسیدا ئەوکات بێگومان زەحمەت نییە ڕێککەوتنەکە بەباشی بچێتە پێشەوە و سەربگرێت، چونکە لایەنی کوردی ڕاستگۆیە لەوەی کە سوریای نوێ سوریایەکی دیموکرات بێت و سوریای پێکەوە ژیان بێت، سوریای جێ بەجێ کردنی داواکاری هەموو پێکهاتەکان و جێکردنەوەیان بێت لەناو مەنزومەی بەڕێوەبردنی وڵات، بۆیە پێشبینی ئێمە ئەوەیە تەحەدای زۆر لەبەردەم جێ بەجێ کردنیدا هەیە و پرۆسەکە ئاسان نییە و پێویستی بە دان بەخۆداگرتن و ئیشکردن و پاڵپشتیکردنی دەرەکی هەیە بەشێوەیەکی ئیجابی.
لە وەڵامی ئەو پرسیارەی کە ئایە ئەو تێڕوانینانە تاچەند تێڕوانینێکی دروستن لە بارەی ئەوەی کە دەوترێت کورد هەرکات ببێتە بەشێک لە زیندوکردنەوەی وڵاتان ئەوا خودی خۆی لە دواجاردا دەدۆڕێت، بۆ ئەمەش نمونەی باشووری کوردستان دەهێننەوە، ئەمە تاچەند تڕوانینێکی دروستە؟ دکتۆر عەدالەت عەبدوڵا، نوسەر و چاودێری سیاسی ئەوەی خستەڕوو؛"ئەگەر لایەنی دەرەکی بێتە ناو پرۆسەکەوە بەتایبەتی ئەمەریکیەکان کە خۆیان دەوریان هەبووە لەوەی کە ئەو ڕێککەوتنە واژو بکرێت، هەروەها ئەوروپیەکانیش ڕۆڵێکی سەرەکی بگێڕن دەتوانین بڵێین ئەو ڕێککەوتنە هی ئەوەیە گرەوی لەسەر بکرێت، وە دەوڵەتی سوریایش مەحکوم دەکات کە ڕێککەوتنەکە گرێ نەداتەوە بە ماوەیەکی زەمەنی دیاریکرا و کە تیایدا دەوڵەتی سوریا لاوازە یاخود بەهێزە، واتە بابەتەکە ببێتە بابەتێکی مەبدەئی و دەستوری.
ئاماژەی بەوەکرد، ئێستا لە عێراقدا ڕاستە ئێمە ململانێ و کێشەمان هەیە، بەڵام هەمیشە کۆمەڵێک ماددەی دەستووری هەن کە مافی ئێمە وەک نەتەوەیەکی سەرەکی لە عێراقدا دەسەلمێنێت و دەتوانین لای کۆمەڵگەی نێودەوڵەتی دەتوانین بڵێین ئەوە دەوڵەت خۆیەتی پێشێلی ماددە دەستووریەکان دەکات، بۆیە بە بڕوای ئێمە ئەمە بەشێکی پەیوەندی بەوەوە هەیە کە چاودێرییەکی نێودەوڵەتی بەهێز هەبێت بەسەر ڕێککەوتنەکەوە، هەروەها قەناعەتێکیش لە دیمەشقەوە دروست ببێت کە سوریا بەڕێوە نابرێت بەبێ حیسابکردن بۆ پێکهاتەکانی دیکە و بەتایبەتی بۆ کورد کە ئێستا خۆی لە مەیدانا بەشێکی زۆری خاکی سوریا و ناوچە کوردستانیەکانی لەژێر دەسەڵاتیدایە، بۆیە دەبێت حیسابی بۆ بکرێت، بۆیە لە ئێستاوە دەبێت هەندێک دەستەواژە هەیە کۆتایی پێبهێنرێت بۆ نمونە مەسەلەی جموری عەرەبی سوریا کە ڕەنگە لەگەڵ کۆمەڵگەی فرە پێکهاتەی سوریا نەگونجێت بۆیە ڕونە چۆن شیکاری دەکەیت دەبینیت بەربەستەکان زۆرن لەبەردەم جێ بەجێ کردنی ئەم ڕێککەوتنەدا و بۆیە بەهیواین هەنگاو بە هەنگاو بچێتە پێشەوە.