ڕوانگە-بەمەبەستی خزمەتکردنی زیاتر منداڵانی ئۆتیزم لە شاری کەلار و هەوڵدان بۆ چارەسەرکردنی ئەو منداڵانە و ڕزگارکردنیان لەو گرفتە لە ئێستادا سەنتەرێکی تایبەت بە منداڵانی ئۆتیزم کراوەتەوە و چاوەڕێ دەکرێت لە چەند ڕۆژی داهاتوودا بێ بەرامبەر و بە شێوەیەکی زانستی ڕاهێنان بەو منداڵانە بکرێت کە لەو سەنتەرە ناویان تۆمار کراوە و سەرپەرشتیاری سەنتەرەکەش ڕایدەگەیەنێت؛"دوای وەرگرتنی چارەسەر ئەم منداڵانە دەبنە دەستکەوتێکی گرنگ بۆ کۆمەڵگا، چونکە زۆر زیرەک دەبن و توانایان لە منداڵی ئاسایی زۆر زیاتر دەبێت
نەریمان ئەحمەد ڕەشید سەرپەرشتیاری سەنتەرەکە، بۆ ڕوانگە ڕایگەیاند؛"لە هەرێمی کوردستان ئەوەی تا ئێستا هەیە نزیکەی ١٥ هەزار منداڵی ئۆتیزم تۆمارکراوە، لە وڵاتانی پێشکەوتوو زۆر گرنگیان بەم پرسە داوە، چونکە ئەم منداڵانە لەڕێگە لایانداوە بۆیە بە پەروەردەکردن و ڕاهێنان هەوڵی چارەسەرکردنی ئەم منداڵانە دراوە، بەڵام کە چارەسەردەکرێن ئەم منداڵانە دەبنە دەستکەوتێکی گرنگ بۆ کۆمەڵگا، چونکە زۆر زیرەک دەبن و توانایان لە منداڵی ئاسایی زۆر زیاتر دەبێت.
وتیشی؛" بەداخەوە سەرەڕایی ئەو ڕێژە زۆر، بەڵام لە کوردستاندا زۆر گرنگیان پێ نەدراوە، بەتایبەتی حکومەت زۆر کەمتەرخەمە لە کردنەوەی سەنتەرێک کە کوالێتیەکی باشی هەبێت بۆ ڕاهێنانی ئەم منداڵانە و وەک پێویست کاروباری کۆمەڵایەتی کاریان لەسەر گرنگیدانی ئەم لایەنە نەکردووە.
نەریمان ئەحمەد ڕەشید سەرپەرشتیاری سەنتەرەکە ڕوونیشی کردووە؛" لە زۆرێک لە شار و شارۆچکەکاندا تائێستا سەنتەرێکی تایبەت نییە و لەو شوێنانەش کە سەنتەری ئەهلی تێدادایە تاڕادەیەکی زۆر ئامانجیان کۆکردنەوەی پارەیە نەک ئەوەی کە بتوانن خزمەت بەو منداڵانە بکەن و بەشێوەیەکی زانستیانەو باش ڕایان بهێنن و چارەسەریان بکەن، بۆیە لەسەر ئەو بنەمایە ماوەی ساڵێکە لە سلێمان سەنتەرێکمان کردۆتەوە و لەم سەنتەرەدا بەشێوەی کۆرسات هەوڵی ڕاهێنان لەگەڵ منداڵەکاندا دەدەین و خۆشبەختانە بەشێک لەو منداڵانە دەرچوون، هەربۆیە ئێستا بەنیازین لە قەزای کەلار و چەمچەماڵ چەند سەنتەرێکی لەو شێوەیە بکەینەوە.
نەریمان ئەحمەد ڕەشید ئاشکرایشیکرد؛" خۆشبەختانە لە ئێستادا لە کەلار سەرقاڵی کردنەوەی سەنتەرێکین و بینایەکی تایبەتمان دەستنیشان کردووە کە سەربە وەزارەتی کاروباری کۆمەڵایەتیە و ئێستا فەرمانبەرمان بۆ دابینکردووە و بەشێوەیەکی زۆر زانستیانە ڕاهێنانیان پێدەکەین، هەروەها ئاماژەی بەوەشکرد، لە کەلاردا تائێستا نزیکەی ١١٢ منداڵ ناویان تۆمارکراوە و دەیانەوێت کۆرس وەربگرن ئەمە جگە لە ئەوەی کە لەناو شاری کەلاردا سەدان منداڵی دیکەهەیە کە ناویان تۆمار نەکراوە و لە دەرەوەی کەلاریش سەدان منداڵی دیکەی توش بوو بونیان هەیە.
سەرپەرشتیاری سەنتەرەکە باسی لەوەشکرد؛" ڕۆژی ٤/٢ ڕۆژی جیهانی ئۆتیزمە و دەمانەوێت بۆ ئەمساڵ لەو بەروارەوە دەست بەکاربین و چارەسەر وەربگرن، کە چارەسەرەکانیش خۆی لە ڕاهێنانی سروشتی بەو منداڵانە دەکەین بۆ هەر دوو منداڵێک مامۆستایەکمان دابینکردووە و هەوڵدەدەین بە باشترین شێوە خزمەت بەو منداڵانە بکەین.