ڕوانگە -لە وتوێژی لەگەڵ پەیامنێری ڕوانگە لەبارەی گرنگی ڕێککەوتنی نێوان هەسەدە و سەرۆکی نوێی سوریا و هەروەها گرنگی و بایەخی ڕێککەوتنەکە بۆ هەردوولا بەتایبەت لەم قۆناغەدا دکتۆر یادگار عەلی مامۆستای زانکۆ ڕایگەیاند؛"ئەم ڕێککەوتنە پێمان دەڵێت جۆرێک لە ئۆتۆنۆمی بە کورد دراوە و ئەو ئیدارەیەی کە لە باکور و ڕۆژهەڵاتی سوریا دروست بووە وەک خۆی دەمێنێتەوە و لەوانەیە گۆڕانکارییەکی کەم بەخۆیەوەببینێت کە ئەمانە دەستکەوتی گرنگن بۆ کورد، بەڵام جێبەجێکردنەکەی بۆئێمە گرنگە و دەبێت چاوەڕێ بین."
دکتۆر یادگار عەلی مامۆستا لە زانکۆی گەرمیان ڕایگەیاند؛"ڕێککەوتنی نێوان هەسەدە و سەرۆکی نوێی سوریا بۆ کورد و بۆ دیمەشق یش گرنگە و ئەوەی کە پەیوەندی بە کوردەوە هەیە لە ڕۆژئاوای کوردستان دەزانین لە بارودۆخێکی هەستیاردان و تاوەکو ئێستا تورکیا لە باشووری کۆبانی و چەند ناوچەیەکی دیکەوە پەلاماری ناوچەکانی ژێر دەسەڵاتی هێزەکانی سوریای دیموکرات(هەسەدە) دەدەن و ڕۆژانە خەڵک شەهید و ئاوارە دەبن و تورکیا و گروپە چەکدارەکان بە هەموو شێوەیەک دەیانەوێت سەنگەری پێشەوەی هەسەدە بشکێنن بۆئەوەی بتوانن مەترسی بخەنە سەر کۆبانی و شوێنەکانی دیکەو وە پەلاماری ژێرخانی خزمەتگوزاری و ئابووری ناۆچەکانی ئیدارەی باکوری ڕۆژهەڵاتی سوریا دەدەن، لەگەڵ ئەوەشدا لە لایەکی دیکەوە داعش مەترسییەکی گەورەیە لەوناوچانە، هەروەها ئیدارەی نوێی ئەمەریکاش هیچ گەرەنتییەک نییە بۆ مانەوەی هێزەکانی ئەمەریکا لە سوریا، وە لەگەڵ ئەوەشدا هەسەدە هەرگیز نەیانوتووە ئێمە ئۆپۆزیسۆنین لە سوریا، بەڵکو ئەوان هاتوون وەکو هەوبەشێک بەشداربن لە حکومڕانیدا، بۆیە ئەنجامدانی ئەم ڕێککەوتنە ئەگەر بتوانێت ئەو مەترسیانەیان لەسەر دوربخاتەوە ئەوا هەنگاوێکی گرنگە و چونکە هەموو ئەو هێرش و مەترسیانە مەترسی وجودین لە ڕاستیدا لەسەر مانەوەی ئەو دەستکەوتەی کە کورد لە ڕۆژئاوای کوردستان بەدەستیهێناوە بۆیە ئەمە هەنگاوێکی گرنگە و لەوەش گرنگتر ئەوەیە ئەم ڕێککەوتنە نەبووەتە هۆکارێک بۆئەوەی کە کورد سازش لەسەر مافەکانی بکات."
وتیشی؛"ئەمەریکا و فەرەنساش ئاگاداری ئەم ڕێککەوتنەن و لەژێر چاودێری و داواکاری ئەواندا بووە، لە هەمانکاتیشدا حکومەتی دیمەشق یش لە باشوورەوە لە لایەن ئیسرائیلەوە لەم کاتەدا ڕووبەڕووی داگیرکاری بووەتەوە و ڕۆژانە سەربازگە دروست دەکات و لە لایەکی دیکەشەوە تورکیا بە هەمان شێوە خەریکی داگیرکارییە و لەگەڵ ئەوەشدا لەناوخۆدا بەهەمانشێوە عەلەویەکان و دروسەکان و مەسیحیەکان لەگەڵ ئەو شێوازەی حکومڕانی نین لە سوریا و لەهەمانکاتدا فشاری ئابوورییان لەسەرە و گرفتی کارەبا و سوتەمەنی و دابینکردنی مووچەیان هەیە، بۆیە ئەوانیش پێویستیان بەم ڕێککەوتنە هەیە بۆیە ڕێککەوتنەکە دوولایەنەیە و پێویستییەکە دەبوو ڕووبدات."
دکتۆر یادگار عەلی ڕونیشیکردەوە؛" ئەم ڕێککەوتنە بۆ ئەم قۆناغە زۆر گرنگە و لەوەش گرنگتر جێبەجێ کردنیەتی و تاچەند جێبەجێ دەکرێت دەبێت بوەستین و چاوەڕێی کات بکەین، هەرچەندە بە بڕوای من حکومەتی دیمەشق لەم کاتەدا لە بارودۆخێکدانییە کە بتوانێت بەبێ کورد حکومەت پێکبێنێت و بەوشێوەیەی دەیەوێت حکومڕانی بکات، هەروەها گرنگی ئەم ڕێککەوتنە لەوەدایە ئەم قۆناغە قۆناغی ڕاگوزەرە و لەم قۆناغەدا دەستوور دەنوسرێتەوە و دیزانی حکومڕانی دەوڵەت دیاریدەکرێت بۆیە گرنگە کورد بەشداری هەبێت، بەداخەوە تائێستا بەشداری پێنەکراوە و ئەویشی گرنکە ئەوەیە کە هێزەکانی سوریای دیموکرات بەو چەشنەی ئێستا دەمێننەوە و لەوانەشە تێکەڵ بە سوپای نوێی سوریاببن، بەڵام باس لە هەڵوەشاندنەوەیان نەکراوە و باسیش لەوە نەکراوە کە بەشێوەی تاکەکەسی پەیوەندی بکەن بە سوپاوە، بەڵکو بەشێوەی کوتلەیەک دەمێننەوە و ئەو داوایەشی کە تورکیا و دیمەشق دەیانکرد کەوا دەبێت چەک دابنێن ئەوەش ڕەتکراوەتەوە و ئەم ڕێککەوتنە پێمان دەڵێت جۆرێک لە ئۆتۆنۆمی بە کورد دراوە و ئەو ئیدارەیەی کە لە باکور و ڕۆژهەڵاتی سوریا دروست بووە وەک خۆی دەمێنێتەوە و لەوانەیە گۆڕانکارییەکی کەم بەخۆیەوەببینێت کە ئەمانە دەستکەوتی گرنگن بۆ کورد، بەڵام جێبەجێکردنەکەی بۆئێمە گرنگە و دەبێت چاوەڕێ بین."
ئاماژەی بەوەشکرد؛"لەیەکێک لە خاڵەکانی ڕێککەوتنەکەدا باس لەوە دەکرێت کە تاکۆتای ئەمساڵ بتوانرێت لەڕێگەی ئەو لیژنانەی کە پێکدێت کار لەسەر ناوەڕۆکی ڕێککەوتنەکە بکەن و بۆئەوەش هەشت مانگ کات لە بەردەستیاندایە، بۆیە ئەگەر هەردولا ئیرادەیان هەبێت بە ئاسانی دەتوانن سود لەوکاتە وەربگرن و ڕێککەوتنەکە جێ بەجێ بکەن."
دکتۆر یادگار عەلی مامۆستا لە زانکۆی گەرمیان ڕونیکردەوە؛" بارودۆخ بۆ کورد جیاوازە بەتایبەت بۆیەکەمین جارە دەرفەتێکی گەورەی وەهای بۆ دەڕەخسێت بتوانێت مافەکانی خۆی بەدەسبێنێت و بەشداربووە لە ڕووبەڕووبوونەوەی داعش و ڕوخاندنی ڕژێمەکەی ئەسەد و ئیدارەیەکی سەربەخۆی دروستکردووە و هێزێکی ڕاهێناروی هەیە و لەگەڵ ئەوەشدا دۆستایەتی باشی لەگەڵ هێزە نێودەوڵەتییەکان هەیە، بۆیە ئێستا دەبێت دەستکەوتەکانی لەڕووی دەستووری و یاسایەوە بچەسپێنێت و دورەپەرێزی لەم کاتەدا بۆکورد دەستنادات و ئەمەریکا و ئەوروپاش کە هانی کورد دەدەن ڕێککەوتن بکات دیارە ئەوان ڕووداوەکان باشتر دەبینن و بۆیە پێویستە لە پێکهێنانی حکومەتدا بەشداربێت، بەڵام حکومەتێک کە مافە مەدەنی و سیاسیەکانت بپارێزێت و لەم قۆناغەدا لەڕووی سیاسی و سەربازییەوە جۆرێک لە لامەرکەزیەت هەبێت و بۆئەمەش ڕەنگە سود لە هەرێمی کوردستان وەربگرن و هەڵەکانی ئێمە دووبارە نەکەنەوە و بەجۆرێکی دیکە مامەڵە بکەن، بۆیە دەبێت لەگەڵ حکومەتی سوریادا ڕێکبکەون بۆئەوەی بەپێی دەستوور و یاسا مافەکانیان زامن بکەن و ئەو مەترسیانەشی کە لەسەر دەستکەوتەکانیان هەیە دوری بخەنەوە ئەوەش بەڕێککەوتن دەبێت بەتایبەتی ڕێککەوتنێک کە ئەمەریکا وئەوروپا پشتیوانی دەکەن و چاودێری دەکەن کە ئەمە هەنگاوێکی گرنگە بەتایبەت لەم کاتەدا کە سوریا لەوپەڕی لاوازیدایە، ئەگەر نا ئەوا ڕەنگە ڕۆژگارێک بێت حکومەتی سوریا وەک حکومەتەکەی بەشار ئەسەدی لێ بێت ئەوکات ڕەنگە دان بە کوردا نەنێت بۆیە ئێستا دەرفەتێکی گرنگە و کوردیش زۆر ژێرانە لەگەڵ ڕووداوەکاندا مامەڵەیان کردووە."