ڕوانگە - لەگەڵ هاتنی مانگی ڕەمەزاندا خواست لەسەر کاڵا و شتومەک زیادی کردووە و سەرپەرشتیاری دەروازەی پەروێزخانیش ڕایدەگەیەنێت؛"هاتنی ئەم مانگە بووە بەهۆکارێک بۆ زیادکردنی ئاڵوگۆڕی بازرگانی لەسنوری مەرزی پەوێزخان و بەتایەت زیادبوونی قەبارەی هاوردەکردنی خواردەمەنی."
عەباس ئیسماعیل سەرپەرشتیاری دەروازەی پەروێزخان بۆ ڕوانگە ڕایگەیاند؛"بەدڵنیاییەوە لەگەڵ هاتنی مانگی ڕەمەزاندا کاڵا و شتومەکەکانی وەک خواردەمەنی خواستی لەسەر زیاتر بووە و ئەمەش بووە بە هۆکارێک بۆ زیادبوونی قەبارەی هاوردەکردن لە مەرزی پەروێزخانەوە بەراورد بە مانگەکانی پێشووتر."
عەباس ئیسماعیل سەرپەرشتیاری دەروازەی پەروێزخان ڕونیشیکردەوە؛"هۆکاری زیادبوونی قەبارەی هاوردەکردن لەم مانگەدا بۆ ئەوە دەگەڕێتەوە کە بەهۆی ئەوەی لە مانگی ڕەمەزاندا خەڵکی بەڕۆژوون ئەمەش وایکردووە خواست لەسەر خواردەمەنی و بەتایبەت شیرەمەنیەکان زیادی کردووە، بەڵام زیادکردنە بە ڕێژەیەکی زۆر نییە."
شایەنی باسە خاڵی سنوری پەروێزخان، یەکێکە لە خاڵە سنوورییەکانی نێوان کۆماری ئیسلامی ئێران و هەرێمی کوردستان کە ڕۆڵێکی گرنگی هەیە لە پەیوەندییە ئابوورییەکان و ئاسایشییەکانی نێوان ئێران و هەرێمی کوردستان و عێراق بەگشتی.