ڕوانگە - لەکاتێکدا حکومەتە راستڕەو و دینییەکەی ئیسرائیل درێژە بە ئەنجامدانی تاوانە گەورەکانی جەنگ و پلانی وێرانکردن و لەناوبردنی تەواوەتی فەلەستینییەکان دەدات و خەریکی راونان و ئاورەکردنی فەلەستینییەکانە لەسەر خاک و زادگای خۆیان. هاوکات لەو کاتەدا کە حکومەتەکەی ناتانیاهو دەست لە منداڵ و ژن و پیر و پەککەوتەش ناپارێزێت و هەمووان وەک ئاژەڵ و کەمتر لە ئاژەڵیش مامەڵەدەکات. لە هەمانکاتدا ئەردۆغان و حکومەتەکەی ئەردۆغان هەم تاوانی جەنگ بەرامبەر بە کوردانی رۆژئاوا و هەم تاوانی سیاسیی بەرامبەر بە هێزە ئۆپۆزیسیۆنەکانی ناو تورکیا خۆیشی، ئەنجام ئەدات.
وەکچۆن ناتانیاهو و حکومەتە راسترەوە دینییەکەی بە هەموو شێوەیەک فەلەستینییەکان سەرکوتدەکەن، ئاواش ئەردۆغان و دیدگا دینییە ئیخوانییەکەی هێزە ناڕازییەکانی ناو تورکیا و ئەوانەی پاشخانێکی سیاسیی جیاوازیان لە ئەردۆغان هەیە، سەرکوتدەکات.
وەکچۆن ناتانیاهو درۆ لەگەڵ کۆمەڵگای نێودەولەتی و جیهاندا دەکات، تەنانەت لەگەڵ بەشێکی کۆمەڵگای ئیسرائیلی خۆیشیدا، لانیکەم لەگەڵ کەسو کاری بە بارمتە گیراوەکاندا لای حەماس، ئاوایش ئەردۆعان درۆ لەگەڵ خۆی و کۆمەڵگای تورکیی و ناوچەکە و جیهاندا دەکات. ئاخر ئەمە یەکەمجار نییە ئەردۆغان تۆمەتی تیرۆری ساختە بەرامبەر بە دەیان سیاسەتمەدار و چالاکوان و ڕۆژنامەنووسی ناو وڵاتەکەی خۆی بەکاربهێنێت و بە هەمان تۆمەتەوە پەلاماری وڵاتانی دراوسێی نەدات.
وەکچۆن ناتانیاهو تەواو تاکڕەوانە هەڵسوکەوت دەکات، بە هەمانشێوە ئەردۆغانیش هەم تاکڕەوانە هەڵسوکەوت دەکات و هەم گەشە بە رەوتی تاکرەویی لە ولاتەکەشیدا دەدات.
پەلاماردانی تازەی غەزە و دەستبەسەرکردنی ئەکرەم ئیمام ئۆغڵو سەرۆکی شارەوانی ئەستەنبوڵ، هەردووکیان لەناو یەک عەقڵیەتی سیاسییەوە سەرچاوە دەگرن، عەقڵیەتێکی سیاسیی سادیست و تاکڕەو کە سڵ لە ئەنجامدانی هیچ تاوانێک ناکاتەوە.