ڕوانگە - هەریەک لە وڵاتانی ئەڵمانیا و فەڕەنسا و بەریتانیا داوای درێژکردنەوەی ئاگربەستی نێوان غەززە و ئیسرائل دەکەن و داوادەکەن دەستبەجێ شەڕی غەززە بوەستێت.
لە راگەیەندراوێکی هاوبەشدا وەزیری دەرەوەی ئەڵمانیا و فەرەنسا و بەریتانیا، داوایان لە هەموو لایەنەکان کرد، دووبارە بەشداری دانوستانەکان بکەنەوە، بۆ دڵنیابوون لە جێبەجێکردنی تەواوی ئاگربەستەکە و کردنی بە هەمیشەیی.
لە راگەیەندراوەکەدا ئەوەشیان خستۆتەڕوو؛" دەستپێکردنەوەی هێرشە ئاسمانییەکانی ئیسرائیل بۆ سەر غەززە، هەنگاوێکی کارەساتبارە بۆ خەڵکی کەرتەکە٫ هەروەها ئاماژەشیان بەوەکردووە،" ئەوان لە زیانە مەدەنییەکان و کوشتنی سڤیلەکان تووشی شۆک بوون و بەپەلە داوای گەڕانەوەی خێرا بۆ ئاگربەستەکە دەکەن".
ئەم بانگەوازە هاوبەشە دوای ئەوە هات، کە وەزیری بەرگری ئیسرائیل، هەڕەشەی لکاندنی بەشێک لە کەرتی غەززەی بە ئیسرائیلەوە کرد، ئەگەر حەماس ئەو بارمتە ئیسرائیلییانە ئازاد نەکات کە ماونەتەوە.
رۆژی سێشەممە ئیسرائیل کۆتایی بە ئاگربەستەکە هێنا و هێرشێکی نوێی بۆ سەر کەرتی غەززە دەستپێکرد، بەوەش کۆتایی بەو ئارامییە رێژەییە هێنا، کە لە دوای ئاگربەستەکەوە دروستبووبوو.