ڕوانگە ـ شێوازی رەجەب تەیب ئەردۆغانی سەرۆک کۆماری تورکیا لەکاتی بەشداریکردنی لە پیرۆزکردنی جەژنی نەورۆز، تەواو پێچەوانەی بەها بەرز و پیرۆزەکانی نەورۆزی کوردەواری بوو، رەنگە بەپێی لێکدانەوەی ئەو بەشداریکردنەکەی بۆ هاوبەشێتی لەگەڵ کوردان بێت، بەڵام لە رووەکەی تریەوە بۆ لێدان بوو لە شکۆی نەورۆز و ئاگرە شکۆدارەکەی.
ئەوەی دەیڵێم لەدوو خاڵدا دەردەکەوێت:
یەکەمیان، ئەردۆغان وتی "نەورۆز تەنیا یەک نەتەوە خاوەندارێتی ناکات، بەڵکو کولتووری هاوبەشی هەمووانە و لە چەندین وڵاتدا ئەم رۆژە پیرۆز دەکرێت و بەهاکانی بەرز رادەگیرێن"، ئەوە هەڵەیەکی ئامانجدارە و بۆ دزینی جەژنی نەتەوەیی و سەرەتای ساڵی کوردییە لە نەتەوەی کورد.
دووەمیان، شێوازی ئاگرکردنەوەکەی ئەردۆغان بۆ شکۆ شکاندنی نەورۆزی کوردان بوو، چونکە سەری مەشخەڵەکەی نەوی کرد، لەکاتێکدا سەری مەشخەڵی ئاگرکردنەوە لە نەورۆزی کورداندا بەرەو سەرەوە دەگیرێت و دەکرێتە هێمان بۆ سەرکەوتن و بەرز روانین و بڵندبوونەوە.
باوەڕم وایە، ئەردۆغان ئەو دوو خاڵەی لە نەزانینەوە نەکرد، بەڵکو بۆ ئەوە بوو تورکیش بکاتە هاوبەشێکی نەگریسی کورد و پێمان بڵێت نەورۆز تەنها هیی کورد نییە، بەڵکو تورک و فارس و نەتەوەی دیکەیش خاوەنی نەورۆزن کە راستییەکەی وا نییە.
نەویکردنی مەشخەڵی ئاگرەکەیش هەمان مەبەستی نەگریسی لەپشتەوەیە، کورد ئاگری نەورۆز لە بڵندایی دەکاتەوە؛ ئیتر سەر شاخ یان لوتکە یان سەکۆیەکی بەرزی دروستکراو بێت، ئەو ویستی ئەو شێوازە شکۆیەی ئاگری نەورۆز بشکێنێت، پەیامەکەی ئەوە بوو دەتوانێت نەریت و جەژنی کورد و شکۆیەکی بەناوی برایەتیی ساختەوە بشکێنێت و مۆدێلی خۆی بەسەردا بسەپێنێت.
نموونەی راستەقینەی نەورۆزی کوردان زۆر دوور نەبوو لە ئەردۆغان، لە ئامەدی پایتەختی باکووری کوردستان کوردانی هەر چوار پارچەکەی کوردستانی گەورە کۆبوونەوە، پڕیان کرد لە رۆح و پەیامی کوردانە، سەری خەڵک و گڕی مەشخەڵ و ئاگرەکەی نەورۆز تا ئاسمان بڵندبوون، ئەوە سیحری پیرۆزکردنە ساختەکەی ئەردۆغانی تێکشکاند، کوردان سەلماندیان نەورۆز هەر هیی کوردە و دەیکەنە رۆژی نوێبوونەوە و سەربڵندیی، دەیکەنە دەرفەتی قووڵکردنەوەی برایەتی و یەکگرتوویی و رێگەیش نادەن کەس نەورۆزیان لێ بدزێت و ساختەی بکات و مۆدێلی خۆی بەسەردا بسەپێنێت