ڕوانگە - بڵاو بوونەوەی ڕێژەیەکی زۆر لە دوکەڵی کارگەی بەرهەمهێنانی شیش لە سنوری ناحێی سەرقەڵای سەربە قەزای کفری نیگەرانی گەورەی خەڵک و ڕێکخراوە ژینگەیەکانی گەرمیانی بەدوای خۆیدا هێناوە و چالاکوانێکی بواری ژینگەش ڕایدەگەیەنێت؛" دوکەڵی ئەو کارگەیە زیانی گەورە بە هەموو خەڵکی گەرمیان دەگەیەنێت.
یاسین حەمە ئەمین ئەحمەد چالاکوانی بواری ژینگە بۆ ڕوانگە ڕایگەیاند؛" دوکەڵی ئەو کارگەیە زیانی گەورەی بۆ هەموو خەڵکی گەرمیان هەیە بۆیە بەهیچ شێوەیەک لە بەرامبەر ئەوکارەدا بێدەنگ نابین
وتیشی؛" لە ئێستادا هەڵمەتێکمان ڕاگەیاندووە بۆئەوەی کۆتای بەوگرفتە بهێنین و بە وتەی خاوەنی پرۆژەکە ئەوان لە هەوڵدان بۆ چارەسەرکردنی ئەو کێشەیە و بۆئەو مەبەستەش لە وڵاتی ئێرانەوە فلتەرێکی تایبەتیان هێناوە، بەڵام بەشێک لەو فلتەرە هێشتا نەگەیشتووەتە دەستیان.
یاسین حەمە ئەمین ئەحمەد چالاکوانی بواری ژینگە ڕونیشیکردەوە؛" ئەگەربێت و ئەم گرفتە بەردەوام بێت ئەوا ئامادەین هەموو ڕێگایەک بگرینەبەر بۆ ئەوەی ڕێگری لەو کارەبکەین، چونکە بڵاوبوونەوەی دوکەڵی ئەو کارگەیە زیانی ڕاستەوخۆی هەیە بۆ دانیشتووانی گەرمیان
کارگەی بەرهەمهێنانی شیشی سەرقەڵا نزیکەی دووساڵە دەست بە بنیاتنانی کراوە و لە ئێستادا کارگەکە بە گەڕ خراوە و بڵاو بوونەوەی دوکەڵێکی زۆری کارگەکە نیگەرانی گەورەی خەڵک و ڕێکخراوە ژینگەیەکانی گەرمیانی بەدوای خۆیدا هێناوە.
لای خۆیەوە دلێر عەبدوڵا، بەڕێوەبەری ناحێی سەرقەڵا بۆ ڕوانگە ئاشکرای کرد؛" ئەو کارگەیە تەنها کارگە نییە و هاوشێوەی ئەو کارگەیە لە شارەکانی دیکەی کوردستاندا بوونی هەیە، کە گرنگییەکی گەورەی ئابووری هەیە بۆ ناوچەکە و ژمارەیەکی زۆر هەلی کاری لە ناوچەکەدا ڕەخساندووە و لەگەڵ ئەوەشدا کارگەکە هەموو ڕێگە پێدانێکی یاسایی حکومەتی هەرێمی وەرگرتووە.
وتیشی؛"هەرچەندە ئەو کارگەیە ماوەی دووساڵە دەست بە بنیاتنانی کراوە و من ماوەی چەند مانگێکە وەک بەڕێوەبەری ناحێی سەرقەڵا دەستبەکاربووم، بەڵام هەفتەی یەکەم کۆبوونەوەم لەگەڵیاندا کردووە و مەحزەریان واژوکردووە و کار لەسەر نەهێشتنی ئەو دوکەڵە دەکەن و فلتەری بۆ دابین دەکەن
دلێر عەبدوڵا ڕوونیشیکردەوە؛" دووجار نوسراوەکەی ئەوانم بۆ سەروی خۆم بەرزکردۆتەوە و ئەوەی کە ئەرکی یاسای و ئیداری خۆمە جێبەجێم کردووە و زیاتر لە شەش کۆبوونەوەم لەگەڵیاندا ئەنجامداوە.
دلێر عەبدوڵا، بەڕێوەبەری ناحێی سەرقەڵا ئاشکرایشیکرد؛"تائێستا بەشێک لە پێداویستیەکانی فلتەرەکەیان هێناوە، بەڵام بەهۆی ئەوەی فلتەرەکە لە وڵاتێکی دیکەوە دێت گرفتی سنورییان بۆ دروست دەبێت ئەمەش وایکردووە دانانی ئەو فلتەرە دوابکەوێت.