ڕوانگە - بە بۆنەی ڕۆژی جیهانی شانۆوە، پەیامنێری ڕوانگە لە بارەی شانۆ و گرنگی ئەم هونەرە لە کۆمەڵگادا و هەروەها ڕۆڵی حکومەت و لایەنە پەیوەندیدارەکان لە بەرەوپێشچونی هونەری شانۆدا، گفتوگۆیەکی تایبەتی لەگەڵ هونەرمەند و شانۆکاری دیاری کوردستان، مامۆستا گۆران نامیق دا ئەنجام داوە، ئەمەی خوارەوە دەقی گفتوگۆکەیە.
پ/ئەودۆخەی ئێستای کوردستان تاچەند بەگونجاودەزانن بۆ پێشکەشکردن و برەودان بە هونەری شانۆ؟
وەڵام/
شانۆ لە هەموو بارودۆخێکدا دەتوانێت کاریگەری و ڕۆڵی گەورەی هەبێت لە کۆمەڵگادا، چونکە یەکێکە لە هونەرە گەورە ئینسانیەکان کە لەهەموو دونیادا کاریگەری هەیە و تەنانەت بووەتە هۆی گۆڕینی یاسا لە هەندێک لە وڵاتاندا لەبەرئەوە دەتوانێت ڕۆڵ و کاریگەری گەورەی هەبێت، بەڵام ئەوەی کە هەیە مرۆڤ ئەولەوێتی هەیە لە ژیاندا و هەتا پێداویستیەکانی بۆ دابین نەکرێت ناتوانێت چێژ لە هونەرو ستاتیکا وەربگرێت، بەڵام بە دیوێکی دیکەدا دەبوو حکومەت و لایەنە پەیوەندیدارەکان گرنگی زیاتر بەلایەنی کلتوری بدەن، چونکە ئەوەی کەم بێت لەم وڵاتەی ئێمەدا و وای کردووە مرۆڤی کورد مرۆڤێکی توندوتیژبێت بەوڕادەیەی کە دەستی بچێتە ژیانی خۆی و خێزانی ئەوەیە کە بۆشاییەکی گەورەیە لە بواری ڕۆشنبیری و کلتوری، هەروەها نەبوونی چێژ و ستاتیکا کە شانۆ دەتوانێت ڕۆڵ و کاریگەری گەورەی هەبێت لەم بوارەدا.
پ/چۆن لە ڕۆڵی حکومەت دەڕوانن لە خزمەتکردنی شانۆکاران و هەوڵدان بۆ پێشخستنی هونەری شانۆ؟
وەڵام/
بێگومان دەسەڵاتی سیاسی ئێمە لە هەرەمی دەسەڵاتەوە ناتوانن لەم هونەرە تێبگەن، چونکە بۆ خۆیان ناتوانن چێژ لە هونەر ببینن، بۆیە ناشتووانن لە گرنگی ئەم هونەرە تێبگەن، کاتێک نەیانتوانی لەگرنگی هونەر تێبگەن ئیدی ناشتووانن هاوکار و پشتیوانی هونەرمەندانبن و ناتوانن ئەم پرسە وەک پرسێکی قەیراناوی تەماشابکەن، پشتوانی هونەرمەندانین بۆئەوەی بتوانن شانۆ پێشکەش بکرێت لە تەواوی شارەکان و تەنانەت بگات بە شارۆچکە و گوندەکان و هەروەها ئەو شوێنانەی کە زۆر گرنکە شانۆیان تێدا پێشکەش بکرێت، وە گروپی بچوک بچوکیان بۆ دروست بکرێت بۆئەوەی کە شانۆ پێشکەش بکەن، بۆیه حکومەت ناتوانێت پشتوانی لەم هونەرەبکات و ناتوانێت لە کاریگەریەکانی ئەم هونەرە تێبگات،چ لەسەر مرۆڤی ئێمە و چ لەسەر کەیسی کوردبوونی ئێمە، هەروەها کەسی ئەو هەموو قوربانیدانەی ئێمە، کە دەکرێت لە ڕێگەی هونەرەوە خەم و ئازارەکانمان بگات بە هەموو دونیا، کە ڕەنگە ئەم هونەرە کاریگەری لەسەر بیرکردنەوەی هەموو دونیا هەبێت وەک ئەوەی کە جولەکەکان لە سەر کەیسی هۆڵۆکۆست، هەروەها هەموو میللەتانی دونیا بەجۆرێک لە جۆرەکان کار لەسەر پرسەکانی خۆیان دەکەن لەڕێگەی هونەرەوە و دەتوانن خۆیان و پرسەکانیان لەم ڕێگەیەوە بە دونیا بناسێنن
پ/شانۆ لە کوردستان توانیویەتی پەیامەکانی خۆی بگەیەنێت،؟ چۆن لە بینەری کورد دەڕوانن و چی جیاوزییەک لەنێوان بینەری ئێستا و ڕابردوودا هەیە؟
وەڵام/
پەیامی شانۆ پەیامێکی قوڵ و گرنگە، لەبەرئەوەی شانۆ پێیەکی بە قوڵی لەناو فەلسەفە و ئەدەب و مێژوو ستاتیکا و جوانیدایە، لەبەرئەوە شانۆ خەڵکی خۆی دەوێت و مامەڵەکردن لەگەڵ ئەم هونەرەدائاسان نییە و ناکرێت هەموو ئەو ئیشە کاڵ و کرچانەی لێرە و لەوێ دەیینین وەکو هونەری شانۆ تەماشای بکەین، بۆیە هونەری شانۆ پێویستی بە مەعریفەیەکی قوڵە هەیە بۆئەوەی بتوانین مامەڵی لەگەڵ بکەین، چونکە ئەوەی ئێمە دەیبینین لە دونیادا دەستیان بردووە بۆم هونەرە خەڵکانێک بوون کە زۆر ناوبانگی گەورەیان هەبووە و خڵکانێک بوون کە ڕۆشنبیرییەکی گەورەی هونەری و ئەدەبی و سیاسیان هەبووە، لەبەرئەوە ئاسان نییە هەموو کەسێک دەستببات بۆ ئەم هونەرە، بێگومان میللەتی ئێمەش میللەتێک نییە کە بەتەواوەتی ئەم هونەرەی پێگەیشتبێت، و وەک خۆی قبوڵی کردبێت، بۆیە لەڕووی کۆمەڵایەتیەوە ڕەنگەبەکەم سەیربکرێت، بۆیە بینەری ئێمە نەیتوانیەوە ئەم هونەرە بەجدی وەربگرێت و بۆیە ئەوەی دەیبینێت لێرە و لەوێ بە هونەر لێی تێدەگات، لەکاتێکداهونەری شانۆ زۆر لەوە قوڵترە، بەداخەوە کورد نەیتوانیوە بینەرێک بۆ شانۆکەی دروستبکات کە ئەمە ئەرکی پەروەردە و ڕۆشنبیری و هەموومانە بەگشتی.