ڕوانگە - لە وتوێژی لەگەڵ پەیامنێری ڕوانگە لە بارەی ڕۆژی جیهانی قودس و ئەو غەدرە گەورەیەی کە لە مسوڵمانانی فەڵەستین دەکرێت و هەروەها هۆکاری ئەو بێدەنگییەی کە بەرامبەر بە غەزرەهەیە، مامۆستا مەلا نادر عەلی وتارخوێن و نوێنەری ئاشتی لە ڕۆژهەڵاتی ناوەڕاست ڕایدەگەیەنێت:"قودس شوێنی پێکەوەژیانە و ناکرێت هیچکەسێک قودس بۆخۆی قۆرخ بکات.
ئەگەرچی ڕۆژی قودس ڕۆژێکە بەجیهانی کراوە، بەڵام لای ئێمە وەکو ئیسلام، وەکو موسوڵمان و وەکو زانایان و جێگرەوەی پێغەمبەری ئیسلام (د.خ)، کەس لە خۆمان لە پێشتر نابینین نە لە ئیسلام و نە لە پێغەمبەر، چونکە یەکەم ڕووگەی هەموو باوەڕدارانە بە هەموو ئاینەکانەوە، بۆیە بۆ ئێمەی موسوڵمان، قودس 16 مانگ ڕوگەمانبووە و یەکێکە لەو سێ مزگەوتەیەی کە بە پیرۆز و بە گەورەی قبوڵ دەکەین، هەموو مسوڵمانان ڕوویان کردۆتە ئەوێ، قودس شوێنی پێکەوەژیانە و هەر بە پیرۆزیش دەمێنێتەوە.
وتیشی:" پێموایە لەوکاتەوەی کە فتوحات دەستی پێکردووە قودس وەکو پیرۆزییەک هێڵراوەتەوە بۆئەوەی بەتایبەت نەبێت بە موڵکی مسوڵمانان، بگرە قودس بە پیرۆزیەکەی خۆی جێگەی هەموو ئاینەکانی تێدا بمێنێتەوە، وە قودس ئەو شوێنەیە کە پێغەمبەری ئیسلام لەشەوی ئیسرا و میعراج دا لەوێ پێشنوێژی بۆ مسوڵمانان و باوەڕداران دەکات و لەوێوە دەچێتە بارەگای پەروەردگار
لەوەڵامی ئەو پرسیارەی کە ئێستا دەبینین جەنگێکی نابەرامبەر لە قودس دا دژی مسوڵمانان ئەنجامدەدرێت ئایە ڕژێمی زایۆنیستی هەروا بە ئاسانی دەستبەرداری ئەم جەنگە دەبێت، یاخود ئەمە جەنگێکی پلان بۆ داڕێژراوە و درێژەی دەبێت؟
مەلا نادر عەلی مامۆستای ئاینی و نوێنەری ئاشتی لە ڕۆژهەڵاتی ناوەڕاست ڕونیکردەوە:" پرسی قودس چۆن لای ئێمە پیرۆزە ئاواش لای ئەوانی دیکە پیرۆزە، هەرچەندە لە ناو مسوڵماناندا هەندێک باڵ و تەوژم هەیە پێیوایە نەهێڵێت هیچ ئاینێکی دیکە لە قودس دا بوونی هەبێت، لە بەرامبەریشدا لە ناو جولەکە و مەسیحیشدا خەڵکانێکی توندڕەو هەیە کە کەسی دیکەیان پێ قەبوڵناکرێت، بۆیە ئێستا کە جولەکە لەوێ باڵادەستە پێیان قەبوڵنییە هیچ هێز و لایەنێکی دیکەی غەیری خۆیان وجودیان هەبێت لە قودس دا، بەڵام قودس شوێنی پێکەوەژیانە و ناکرێت هیچکەسێک قودس بۆخۆی قۆرخ بکات، بەڵام ئەوان ئەوەندەی کە توانایان هەبێت شەڕی خۆیان دەکەن و نایانەوێت کەسی دیکەی تێدابژێت.
مەلا نادر عەلی مامۆستای ئاینی و نوێنەری ئاشتی لە ڕۆژهەڵاتی ناوەڕاستدا، ئاشکرای دەکات:"ئێستا جیهانی ئیسلامی بەتایبەتی و دونیا بەگشتی بەرامبەر ئەو غەدرەی کە لە مسوڵمانانی فەڵەستین دەکرێت بێدەنگن و بۆ ئەوەش کۆمەڵێک هۆکارهەیە لەپشت ئەوە بێدەنگییەوە ئەویش ئەوەیە، کەمسوڵمانان بەگشتی دەیانویست پارێزگاری بکەن، بەڵام لەدواجاردا عەرەب ئەم جەنگەی کرد بە جەنگی عەرەب ئیسرائیل، ئەمەش وایکرد وڵاتە ئیسلامیەکانی دیکە لەم جەنگە بکشێنەوە، بەڵام ئێمە وەکو کورد تا ئەم چرکەساتە هەڵوێستی خۆمان هەیە و هەبووە لەسەر هەموو زوڵمێک کە لە غەززە و قودس و هەر وڵاتێکی دیکە کرابێت، بەڵام لە بەرامبەردا یەک وڵاتی ئیسلامی لەسەر ئەو هەموو غەدرەی لە ئێمەی کورد کرا بەدەنگ نەهاتوون .