ڕوانگە - ئەحمەد شەرع سەرۆکی کاتی سوریا پێکهێنانی حکومەتی نوێی ڕاگەیاند و جەختی لەوە کردەوە کە" نوێنەرایەتی ئیرادەیەکی بە کۆمەڵ دەکات بۆ بنیاتنانی دەوڵەتێکی مۆدێرن لەسەر بنەمای شەفافیەت و لێپرسینەوە و بەرەوپێشبردنی سەقامگیری نیشتمانی". 

لە وتارێکی فەرمیدا کە لەلایەن میدیاکانەوە پەخشکرا و ئەحمەد شەرع ڕایگەیاند" پێکهێنانی حکومەتی نوێ ڕاگەیاندنی ئیرادەی هاوبەشمانە بۆ بنیاتنانی دەوڵەتی نوێ". 

ئاماژەی بەوەشکرد، حکومەت کاردەکات بۆ دووبارە بنیاتنانەوەی دامەزراوەکانی دەوڵەت لەسەر بناغەکانی لێپرسینەوە و شەفافیەت.

سەرۆکی کاتی سووریا ڕوونیکردەوە کە حکومەت هەوڵ دەدات" ئاسۆی نوێ لە کەرتەکانی پەروەردە و تەندروستی بکرێتەوە". 

جەختیشی کردەوە کە" لە ئەولەویەتەکانیدا چاکسازی لە دراوی نیشتمانی و بەهێزکردنی دراوی سووریا و ڕێگریکردن لە دەستکاریکردنییەتی، لەبەر ڕۆشنایی ئەو ئاستەنگانە ئابوورییانەی ڕووبەڕووی وڵاتەکە دەبێتەوە". 

هەروەها ئەحمەد شەرع دوپاتیکردەوە کە" حکومەتەکەی گرنگی بە پاراستنی هاوڵاتییان و بەرەوپێشبردنی سەقامگیری ناوخۆ دەدات، دامەزراندنی وەزارەتی فریاکەوتن و بەڕێوەبردنی کارەسات وەک دەزگایەکی حکومی تایبەتمەند بۆ وەڵامدانەوەی هەر ڕووداوێک یان تەحەددییەکی ئەگەری ئاشکرا کرد". 

ئەوەشی خستەڕوو، حکومەتەکەی کاردەکات بۆ بنیاتنانی سوپایەکی نیشتیمانی بەهێز کە بەرپرسە لە پاراستنی ئاسایش و سەروەری وڵاتەکەی، لە چوارچێوەی دیدێکی هەمەلایەنە بۆ داڕشتنەوەی دامودەزگاکانی دەوڵەت. 

دوای ڕووخانی ڕژێمی بەشار ئەسەد سەرۆکی پێشووی سوریا، دەسەڵاتدارانی سوریا لە ناوەڕاستی مانگی ئازاردا بەیاننامەیەکی دەستوری بۆ قۆناغی ئینتقالی پەسەند کرد کە لە بەیاننامەکەدا ماوەی ئینتقالی پێنج ساڵە دیاریکراوە و لەو ماوەیەدا ئەحمەد شەرع بەشێوەیەکی کاتی وەک سەرۆک کۆماری سوریا دەسەڵاتی جێبەجێکردن دەگرێتە ئەستۆ.