ڕوانگە-بەرەبەیانی ئەمڕۆ دووشەممە ٢٠٢٥/٣/٣١ بەهۆی شەڕ و دەمەقاڵێی نێوان دوگەنجەوە لەکەلار یەکیا بە چەقۆ ئەوی دیکەیان دەکوژێت.
عەلی جەمال قدووری، وتەبێژی پۆلیسی گەرمیان بۆ ڕوانگە ڕایگەیاند:"لە ئەنجامی شەڕەکەدا یەکێک لە گەنجەکان بە چەقۆ هێرشی کردووەتە سەر ئەوی دیکە و دوای گەیاندنی بە نەخۆشخانە، گیانی لەدەستدا."
وتیشی:"گەنجەکەی کوژراوە ناوی ئالان ئاسۆ حەمەڕەشیدە، لەدایکبووی ساڵی 2007 و، دانیشتووی گەڕەکی ئازادیی قەزای کەلار بووە.
وتەبێژی پۆلیسی گەرمیان ڕونیشیکردەوە:"دوای رووداوەکە، پۆلیسی بەشی نەهێشتنی تاوانی گەرمیان چوونە شوێنی رووداوەکە و توانیان تۆمەتبار بەناوی (ئ. ئ. ح.) کە لەدایکبووی 2006، دەستگیربکەن.
عەلی جەمال قدووری، وتەبێژی پۆلیسی گەرمیان ئاماژەی بەوەشکرد:"تاوەنبارەکە دوای دەستگیرکردنی دانی بە تاوانەکەدا ناوە و ئێستا بە بڕیاری دادوەری لێکۆڵینەوەی کەلار، بەپێی مادەی 406 لەیاسای سزادانی عیراقی راگیراوە. لێکۆڵینەوەش لە رووداوەکە بەردەوامە."