ڕوانگە - بەڕێوەبەری گەشتیاری پارێزگای کوردستان - سنە، ئاشكرایدەكات، هاتنی گەشتیاران لەهەرێمی كوردستانەوە بۆ پارێزگاكەیان لە رێگەی دەروازەی سنووری باشماخەوە بەراورد بە ساڵی ڕابردوو لەمكاتەدا بە ڕێژەی لە%38 زیادیكردووە.
مەنسوورمێهرزاد، بەڕێوەبەری گەشتیاری و میراتی كولتووری پارێزگای کوردستان - سنە رایگەیاند: لە ناوەڕاستی ئەم مانگەوە ژمارەیەكی بەرچاوی گەشتیار لە رێگەی دەروازەی سنووری باشماخەوە هاتوونەتە پارێزگای سنە، بەجۆرێك ژمارەكە ئەوە دەردەخات كە هاتنی گەشتیار بەراورد بە هەمان ماوەی ساڵی ڕابردوو بە رێژەی 38٪ زیادیكردووە.
ئاماژەی بەوەشكردووە، لە 15/3/2025 وە تا ئەمڕۆ لەو ماوەیەدا 22 هەزار و 486 گەشتیار لە رێگەی سنووری باشماخەوە هاتوونەتە پارێزگای سنەی ڕۆژهەلاتی كوردستان، هاوكات لە 10 رۆژدا 203 هەزار و 725 گەشتیار چوونەتە پارێزگای سنە و ئەو شارانەی زۆرترین گەشتیار رووی تێكردوون بریتین لە بانە، مەریوان و سەوڵاوا.
بەڕێوەبەری گەشتیاری و میراتی كولتووری پارێزگای کوردستان - سنە ئەوەشی وتووە، دەروازەی نێودەوڵەتی باشماخ یەكێكە لە گرنگترین دەروازە سنوورییە وشكانییەكانی ئێران كە بووەتەهۆی گەشەی ئابووری و بازرگانی لە ناوچەكە و جگە لەوەش رۆڵێكی بەرچاوی لە گەشەپێدانی كەرتی گەشتیاریی پارێزگاكە هەیە.