ڕوانگە - عەلی لاریجانی، ڕاوێژکاری ئایەتوڵڵا خامنەیی ڕێبەری باڵای شۆڕشی ئیسلامیی ئێران ڕایگەیاند: هەر هەڵەیەکی ئەمریکی سەبارەت بە بەرنامە ئەتۆمییەکەمان دەتوانێت ناچارمان بکات لەژێر فشاری خەڵکدا، چەکی ئەتۆمی دروست بکەین.
لاریجانی لە بەرنامەیێکی تەلەفزیۆنی ئێران وتی: ئیسرائیل دەیەوێت ئەمریکا پاڵ بنێت بۆ ڕووبەڕووبوونەوە لەگەڵ ئێران.
ڕاشیگەیاند: ئەگەر واشنتۆن هەڵەیەکی ستراتیجی سەبارەت بە بەرنامەی ئەتۆمی ئێران بکات، ناچارمان دەکات ڕێگای دیکە بگرینە بەر.
ئاشکراشی کرد: ناوەڕۆکی پەیامەکەی ترەمپ جیاوازی نییە لەگەڵ لێدوانەکانی، تەنها بە زمانی دیپلۆماسی پێشکەش کراوە.
وتیشی: کردەوەی سەربازی لە دژی ئێمە شتێکی بێ بیرکردنەوە، بەڵام فەرماندە سەربازییەکانمان بۆی ئامادەن، تەنانەت ئەگەر ئەگەری ڕوودانیش کەم بێت.
هۆشداریشی دا: کردەوەی سەربازی دژی ئێمە بێ دەرئەنجام نابێت و ئەمریکییەکان لە هێرشکردنە سەر ئێمە چ سوودێکیان دەستدەکەوێت؟
جەختی لەسەر ئەوەش کردەوە: ئێمە شەڕمان ناوێت، ترەمپیش بانگەشەی ئەوە دەکات کە ئاشتی دەوێت، بۆیە باشترە خۆی لە هەڕەشەکردن لە شەڕ بپارێزێت.
وتیشی: ئیسرائیل توانای ڕووبەڕووبوونەوەی ئێمەی بە تەنیا نییە و هەمیشە ئامرازێک بووە لە دەستی واشنتۆن لە ناوچەکەدا.
هۆشداریی توندیشی دا کە هەر هەڵەیەکی ئەمریکی سەبارەت بە بەرنامە ئەتۆمییەکەمان دەتوانێت ناچارمان بکات لەژێر فشاری خەڵکدا، چەکی ئەتۆمی دروست بکەین.
لە کۆتایی دا وتی: بەئامانجگرتنی بەرنامەی ئەتۆمی زیان بە ئەمریکا دەگەیەنێت و نابێتە ڕێگر لەبەردەم بەرنامە ئەتۆمییەکەمان.