ڕوانگە - لە لێدوانێکی ڕۆژنامەوانیدا بەرپرسی سیاسەتی دەرەوەی یەکێتیی ئەوروپا رایگەیاند:" یەکێتیی ئەوروپا پێشوازی لە پێکهێنانی حکومەتی نوێی راگوزەر لە سووریا دەکات و ئامادەن بۆ هاوکاریکردنی ئەو حکومەتە."
کایا کاڵاس بەرپرسی سیاسەتی دەرەوەی یەکێتیی ئەوروپا رایگەیاند، ئامادەن بۆ هەماهەنگی لەگەڵ حکومەتی نوێی سووریا.
کایا کاڵاس، ئاشکرایشیکرد:" یەکێتیی ئەوروپا پێشوازی لە پێکهێنانی حکومەتی نوێی راگوزەر لە سووریا دەکات و ئامادەن بۆ هاوکاریکردنی ئەو حکومەتە لە چارەسەرکردنی کێشەکان و رووبەڕووبوونەوەی ئاڵنگارییەکانی بەردەمی."
رۆژی شەممەی رابردوو (29ی ئازار) لە شاری دیمەشقی پایتەختی سووریا، رێوڕەسمى راگەیاندنى حکومەتى نوێى سووریا بۆ قۆناغى راگوزەر بەڕێوەچوو.
هاوكات لە رێوڕەسمەکەدا وەزیرەکانی حکومەتی سووریا ناسێندران و ئەحمەد شەرع رایگەیاند، پێویستە داواکارییەکانى گەلى سووریا لەبەرچاو بگرن و ئامانجیانە دەوڵەتێکى سەقامگیرى هاوبەش پێکبهێنن و دامەزراوەکانى دەوڵەت دروستبکەنەوە.