ڕوانگە- لە ڕاگەیەندراوێکدا نوسینگەی سەرۆکوەزیرانی عێراق بڵاوی کردەوە:" ئەمڕۆ سێشەممە، 01ـی نیسانى 2025، محەممەد شیاع سوودانى، سەرۆکوەزیرانى عێراق و ئەحمەد شەرع، سەرۆککۆمارى سووریا بە تەلەفۆن پیرۆزبایی جەژنى رەمەزانیان لەیەکدى کرد.
لە ڕاگەیەنراوەکەدا ئەوەشخراوەتەڕوو:" لەو پەیوەندییەدا محەممەد شیاع سوودانى پیرۆزبایی پێکهێنانى حکومەتى کاتى سووریاى لە شەرع کرد، کە شەممە 29ى ئادارى 2025 پێکهێنرا٫ هەروەها هەڵوێستى عێراق نەگۆڕە لە پاڵپشتیکردنى بژارەکانى گەلى سووریا و گرنگى کۆکردنەوەى سەرجەم پێکهاتەکانى لە پرۆسەى سیاسیی ئەو وڵاتە، بەشێوەیەک کە بە ئاڕاستەى پێکەوەژیانى ئاشتیانە و ئاسایشى کۆمەڵایەتى بێت لە پێناو ئاییندەیەکى سەقامگیر و ئاسایش بۆ سووریا و تێکڕاى ناوچەکە."
سەرۆکوەزیرانى عێراق ڕوونیشیکردۆتەوە:" سنووربەزاندنى سووریاى لەلایەن ئیسرائیلەوە رەتدەکەینەوە و پاڵپشتى دەکەین بۆ پارێزراوى خاکى سووریا و سەروەرییەکەى و دەستوەردانى دەرەکى، هەروەها سوودانى باسی لە گرنگى هاریکاریی دوولایەنە کردووە بۆ رووبەڕووبوونەوەى مەترسیى رێکخراوى داعش و هاوکارى لە بوارى ئابوورى.
لای خۆشیەوە ئەحمەد شەرع سەرۆککۆماری سوریا، لەو پەیوەندییە تەلەفۆنییەدا دۆسیەى ئاسایشى سنوور و هاریکاریی نێوانیان بۆ بنبڕکردنى بەقاچاخبردنى مادەى هۆشبەریان لەگەڵ سەرۆکوەزیرانی عێراقدا تاوتوێ کردووە و جەختیان لەهەڵدانەوەى پەڕەیەکى نوێ کردووەتەوە لە پەیوەندى نێوانیان لەسەر بنەماى هاریکاریی هاوبەش بۆ رووبەڕووبوونەوەى ئاڵنگارییە هەرێمییەکان و رێگرى لە گرژى ناوچەکە، هەروەها جەختى لە رێزگرتن لە سەروەریى عێراق و پەرۆشى بۆ دەستوەرنەدان لە کاروبارى نێوخۆیى عێراق کردووەتەوە.