ڕوانگە - وەزیری بەرگری ئیسرائیل ڕایگەیاند، بۆ کۆنترۆڵکردنی ڕووبەرێکی زیاتر و فراوانتری کەرتی غەززە، ئۆپەراسیۆنە سەربازییەکانی فراوانتر دەکات، ئەمەش لە کاتێکدایە ڕێکخراوی پرۆگرامی خۆراکی جیهانیی سەر بە نەتەوە یەکگرتووەکان، هۆشداری لە داخرانی نانەواخانەی زیاتری کەرتی غەززە و نەمانی خۆراکی پێویست دەدات.
یسرائیل کاتس، وەزیری بەرگری ئیسرائیل بەرە بەیانی ئەمڕۆ چوارشەممە 2ی نیسانی 2025، لە ڕاگەیەندراوێکدا ئاماژەی بە جولاندنی هێزی زیاتری سەربازی کردووە و ڕایگەیاندووە، فراوانکردنی ئۆپەراسیۆنە سەربازییەکانی سوپای ئیسرائیل لە کەرتی غەززە بۆ کۆنترۆڵی ڕووبەرێکی فراوانتری کەرتەکەیە لەگەڵ دەرکردنی چەکدارانی حەماس و لەنێوبردنی ژێرخانەی تواناکانی ئەو ڕێکخراوەیە.
هەروەها ڕایگەیاندووە، لەم ئۆپەراسیۆنەدا مەبەستیانە پاراستنی ئاسایشی ئیسرائیل تۆکمەتر بکەن، هەربۆیە لەو ناوچانەی بە سنووری ئۆپەراسیۆنی سەربازی دیاری کراون، لە دانیشتووانی غەززە چۆل دەکرێن.
هاوکات لەگەڵ فراوانکردنی ئۆپەراسیۆنەکانی سوپای ئیسرائیل، بەرپرسی پرۆگرامی خۆراکی جیهانیی سەر بە ڕێکخراوی نەتەوە یەکگرتووەکان لە غەززە ڕایگەیاندووە، لە سەرەتای مانگی ڕابردووەوە، ئیسرائیل تەواوی دەروازەکانی گەیشتنی خۆراک و هاوکارییە مرۆییەکانی بۆ کەرتەکە داخستووە، بەهۆیەوە خۆراکێکی ئەوتۆ نەماوە و ناچارە تەواوی نانەواخانەکانی کەرتی غەززە دابخەن.
بەرپرسی پرۆگرامی خۆراکی جیهانیی لە کەرتی غەززە یاداشتێکی بۆ نووسینگەی سەرەکی نەتەوە یەکگرتووەکان ناردووە و ئاماژەیداوە، لەوەتەی ئیسرائیل هێرشەکانی چڕکردووەتەوە بۆ ئەوەی بزووتنەوەی حەماس ناچار بە قبووڵکردنی گۆڕانی ڕێککەوتنی ئاگربەست بکات، ڕێگری لە گەیشتنی هاوکارییە مرۆییەکان دەکات، بەمەش ژیانی نزیکەی دوو ملیۆن فەڵەستنی لە کەرتی غەززە لەبەردەم هەڕەشەی برسێتیدایە.
هەروەها ئاماژەیداوە، پرۆگرامی خۆراکی جیهانیی، ئەو بڕە خۆراکەی لەبەردەستی بووە دابەشیکردووە و ئێستاش ناتوانێت لەو نانەواخانەی ماون، لە پێدانی نان بە خەڵکی لێقەوماو بەردەوام بێت، لە کاتێکدا خەڵکێکی زۆر ئۆمێدی ڕزگار بوونیان لە برسێتی لەسەر هەڵچنیوە، هەربۆیە ئەگەر دۆخەکە بەردەوام بێت، ناچارە تەواوی نانەواخانەکان دابخات.
لەلایەن خۆیەوە ئۆلیگا چیریڤکۆ، گوتەبێژ بە ناوی نووسینگەی نەتەوە یەکگرتووەکان بۆ هەماهەنگیی کاروباری مرۆیی ڕایگەیاندووە، پرۆگرامی خۆراکی جیهانی لە دوای ئەوەی لە مانگی ڕابردوو بەهۆی کەمبوونەوەی ئارد ناچاربوو شەش نانەواخانە دابخات، ئێستاش ئەگەر هاوکاری پێویست نەگات، ناچارە 19 نانەواخانەی دیکەش دابخات، لە کاتێکدا نان بە هەزاران کەس لە دانیشتووانی دەدات.