ڕوانگە- حاڵەتەکانی شەڕە چەقۆ لە گەرمیان ڕۆژ لە دوای ڕۆژ ڕوو لە زیادبون دەکات و ئەمەش بووەتەهۆی بڵاوبونەوەی ترس و دڵەڕاوکێ لەناو هاوڵاتیاندا و چالاکوانێکی مەدەنیش ڕایدەگەیەنێت؛"داواکارین لە لایەنە پەیوەندیدارەکان کە هەنگاوی جدی بنێن بۆ کەمکردنەوە و بنەبڕکردنی ئەم حاڵەتانە.
ئیبراهیم زەریف کەسایەتی دیاری کەلار و چالاکوانی مەدەنی لەوشارە بۆ ڕوانگە ڕایگەیاند:"ئێمە لە کوردستاندا هەموو شتێکمان دۆڕاندووە تەنها ئەمن و ئەمانەکەمان هەبووە، کەچی ئێستا بەداخەوە خەریکە ئەمن و ئەمانەکەشمان لەدەست دەردەچێت
ووتیشی:" لەسەرەتای ساڵی ٢٠٢٥ ەوە تائێستا سێ کەس بە چەقۆ کوژراون، کە ئەمە بەتەواوی نیگەرانی کردوین، بۆیە وەک چالاکوانانی مەدەنی و ژمارەیەک لە نوێنەری ڕێکخراوەکان و کەسایەتییە دیارەکان پەنامان بردووە بۆ دادگا و پێمان ڕاگەیاندوون کە ئەمە دۆخێکی زۆر مەترسیدارە و پێویستە ڕێگری لێبکرێت.
ئیبراهیم زەریف ڕوونیشیکردەوە:" خۆشبەختانە بە دەمەوەهاتنێکی باش هەبوو لە لایەن حاکم ئاوات حاکمی شاری کەلار و دەستبەجێ بڕیاریدا ئەو کەسانەی کە بە چەقۆوە دەگیرێن نابێت بە کەفالەتیش ئازادبکرێن،
ئیبراهیم زەریف چالاکوانی مەدەنی باسی لەوەشکرد:" بەداخەوە لەئێستادا لەکەلار خەڵک لەدۆخێکی دەرونی زۆرخراپدایە، هەرچەندە لەلایەن هێزە ئەمنیەکانەوە هەڵمەتێکی چڕ دەستی پێکردووە، بەڵام بە بەردەوام پێویستیمان بە هێزە ئەمنیەکانە بۆ ئەوەی بەردەوامبن لەم هەڵمەتە و هەروەها پێوستیمان بە دەزگاکانی ڕاگەیاندنە کە بەجدی هەڵوێستە لەسەر ئەم پرسە بکەن و ئەوەندەی پێیان دەکرێت هۆشیاری بڵاوبکەنەوە.
لای خۆشیەوە عەقید عەلی جەمال قدووری وتەبێژی پۆلیسی گەرمیان بۆ ڕوانگە ئاشکرایکرد:" ئەوان لە ئێستادا هەڵمەتێکی چڕیان دەستپێکردووە بۆ دەستگیرکردن و لێپرسینەوە لەوکەسانەی کە چەقۆ هەڵدەگرن.
ووتیشی:"ئەم هەڵمەتانە بەردەوامیان دەبێت و خۆشبەختانە هەڵمەتەکان کاریگەرییان هەبووە، بەڵام ئەم کارە تەنها بە هێزە ئەمنیەکان و هێزەکانی پۆلیس ناکرێت، بەڵکو پێویستە خێزانەکانیش لەڕووی پەروەردەییەوە هاوکارمانبن و چاودێری منداڵەکانیان بکەن و ڕێگە نەدەن شەوان تادرەنگ لە دەرەوە بمێننەوە.
عەقید عەلی جەمال قدووری وتەبێژی پۆلیسی گەرمیان ڕونیشیکردەوە:" ئەو ئەرکەی کە لەسەرشانی ئێمەیە وەک هێزەکانی پۆلیس جێبەجێمان کردووە و بە ئەرکی خۆمان هەستاوین، بەڵام دەبێت هەموو چین و توێژەکانی دیکەش هاوکارمانبن، بەتایبەت ئەو لایەنانەی کە پەیوەندییان بە لایەنی پەروەردەییەوە هەیە، چونکە دواجار ئەمانە پێویستیان بەوەهەیە پەروەردە بکرێن و پێویستیان بە ژینگەیەکە تیایدا پەروەردەبن، نەک تەنها ئەوەی کە دەستگیربکرێن و لێپێچینەوەیان لەگەڵدا بکەیت.
هاوڵاتیان پێیان وایە یەکێک لەو هۆکارانەی کەوایکردووە بەکارهێنانی چەقۆ لای گەنجان ببێت بە بابەتێکی ئاسایی ئەوەیە کە لە هەرێمی کوردستاندا یاسا وەکخۆی جێبەجێ ناکرێت و ئەو سزایانەی کە دانراوان بۆ سزادانی کەسانی تاوانبار سزای سوکن و پێویستیان بەوەهەیە گۆڕانکارییان تێدا بکرێت و سزاکان قورستربکرێن بۆئەوەی کەس نەتواننێت تاوانی کوشتن ئەنجام بدات.
عەدنان مەلا ساڵەح یاساناس، بۆ ڕوانگە ئاماژەی بەوەکرد:"بەداخەوە تاوانی شەڕەچەقۆ بەم دوایانە زۆر گوێبیستی دەبین و هەندێکجار دەبێتە هۆی برینداربونی کەسی بەرامبەر و هەندێکجاریش دەبێتە هۆی گیان لەدەستدان و کوشتنی کەسی بەرامبەر، ئەم تاوانە لە یاسای سزادانی عێراقی ژمارە ١١١ـی ساڵی ١٩٦٩ لە بەرچاوگیراوە و لەبیرنەکراوە، ئەگەر بە ئەنقەست کەسێک بکوژرێت ئەوا کەسی تاوانبار سزادەدرێت لە پێنج ساڵ تاوەکو پازدە ساڵ
وەکو سجنی موەقەت هەندێکجاریش سجنی موئەبەد، واتە بەگوێرەی بارودۆخی تاوانەکە، ئەگەر ببێتە هۆی کوشتنی کەسێک کە ٢٠ ساڵە، ئەمە ئەگەر هاتوو شەڕەکە کوتوپڕبێت، بەڵام هەندێک لە حاڵەتەکان ماددەی ٤٠٦ تێدایە بۆنمونە ئەگەر پیلانی بۆ دانابێت کە ئەمە یەکێکە لە حاڵەتەکان و وە حاڵەتی دیکەش زۆرن کە سزاکەی تا لەسێدارەدانیش دەڕوات
ووتیشی:"ئەگەر شەڕەچەقۆیەک هەبوو لە نێوان دووکەسدا کە ببێتە هۆی ئازاردانی کەسی بەرامبەر کە بە پێی ماددەی ٤١٢ لە عقوباتی عێراقی ئەم کەسە ئەگەر بەرامبەرەکەی توشی گرفتێکی گەورەی جەستەی بکات ئەوا دادوەر دەتوانێت تاوەکو ١٥ ساڵ سزای بدات، ئەگەر بە ئەنقەست ئەوکەسە وێستی بەشێک لە جەستەی بەرامبەرەکەی لەکاربخات، بەڵام ئەگەر بەبێ مەبەست ئەوە ڕووبدات ئەوا دادوەر دەتوانێت تا حەوت ساڵ سزای بدات.
عەدنان مەلا ساڵەح ڕونیشیکردەوە:" ماددەی ٤١٣ باسی ئەو حاڵەتانە دەکات کە ئەوکەسە ببێتەهۆی ئازاردانی کەسێکی دیکە، بەڵام ئەگەر نەبێتەهۆی لەکارخستنی بەشێکی جەستەی بەرامبەرەکەی ئەوا دادوەر دەتوانێت کەسی تاوانار حەپس بکات کە لە پێنج ساڵ زیاتر نییە،
ئەو یاسا ناسە ئاشکرایشیکرد:" زیادبوونی حاڵەتەکانی شەڕەچەقۆ کۆمەڵێک هۆکاری هەیە لەوانە، نەبوونی هۆشیاری یاسایی لەلایەن تاکەکانی کۆمەڵگە، هەروەها کاریگەری ئامێرە ئەلکترۆنیەکان و ئەویاریانەی کە شەڕوکوشتنی تێدایە کەوادەکات لە حەقیقەتدا گەنجان لاساییان بکەنەوە، لەگەڵ ئەوەشدا یەکێکی دیکە لە هۆکارەکان زیادەڕەویکردنە لە ئاشتەوایی و سزانەدانی کەسی تاوانبار وادەکات ڕێژەی ئەم تاوانە زیادبکات