ڕوانگە - هەوڵەکان بۆ دابەشکردنی زەوی لە سەرجەم شار و شارۆچکەکان بەردەوامییان هەیە و لەو چوارچێوەیەشدا وەزارەتى کشتوکاڵ و سەرچاوەکانی ئاوی هەرێمی کوردستان ناوی سەرجەم ئەو کەسانەی بڵاوکردەوە کە لە وەرگرتنی زەوی سوودمەند دەبن، کە لە سەرجەم فەرمانگەکانی سەر بە وەزارەتەکە 6118 فەرمانبەر سوودمەند دەبن لە پارێزگاکان و ئیدارە سەربەخۆکان.
پاش دەرچوونی بڕیاری ئەنجوومەنى وەزیرانی هەرێمی کوردستان و دەرچوونى رێنوێنیی وەزارەتى شارەوانى و گەشتوگوزار، بە مەبەستى دابەشکردنى زەویى نیشتەجێبوون بەسەر فەرمانبەران و خانەنشینان، وەزارەتی کشتوکاڵ و سەرچاوەکانی ئاوی هەرێمی کوردستان بڕیاری دا بە پێکهێنانى لیژنەى تایبەت بۆ هەماهەنگى لەگەڵ وەزارەتى شارەوانى و گەشتو گوزار، فەرمانگەکانی سەر بە وەزارەتی کشتوکاڵ و سەرچاوەکانی ئاو، پێدانى رێنوێنی بۆ شێوازى پڕکردنەوەى فۆڕمەکان و چۆنێتی شیکردنەوەى رێنوێنییەکان.
لە ڕاگەیەنراوێکدا وەزارەتی کشتوکاڵ و سەرچاوەکانی ئاو، ناوی 6118 فەرمانبەری سەر بە وەزارەتەکەی لەڕێگەی لیستێکی تایبەتەوە بڵاو کردەوە کە سوودمەند بوون لە وەرگرتنى زەوى، بەپێى سنوورى پارێزگاکان و ئیدارە سەربەخۆکان.
ڕونیشیکردۆتەوە، لەدواى وەرگرتنى رەزامەندیى ئەنجوومەنى وەزیران و وەزارەتى شارەوانى و گەشتوگوزار سەبارەت بەو ناوانەى سوودمەند دەبن لە وەرگرتنى زەوى، سەرجەم ناوى سوودمەندانیان بڵاوکردەوە لە سەرجەم فەرمانگەکانی وەزارەتەکەیان.
هەروەها وەزارەتەکە دوو تێبینیشی بڵاوکردووەتەوە کە ئەمە دەقی تێبینییەکانە:
1- گەڕانەوەى ناوى سوودمەندان لەلایەن وەزارەتى شارەوانى و گەشتوگوزار بەپێى کارتى زانیارى بووە، واتە کارتى زانیارى بووەتە بنەما بۆ دابەشکردنى زەوییەکان بەسەر سنوورى پارێزگاکان و ئیدارە سەربەخۆکان.
2- سەرجەم فۆڕمى سوودمەندان لە دیوانى وەزارەتەوە ئاراستەى وەزارەتى شارەوانى و گەشتوگوزار کران، دوای وردبینی و پێداچوونەوە بە فۆرمەکان و لیستی ناوەکان، ئاراستەی سەرۆکایەتیی ئەنجوومەنی وەزیران کرا، رەزامەندی وەرگیرا و لیستی ناوەکان و فۆرمەکان بۆ ئەنجامدانى کارى پێویست ئاراستەی سەرۆکایەتیی شارەوانییەکان دەکرێت لە پارێزگاکان و ئیدارە سەربەخۆکان.