ڕوانگە - هەوڵەکان بۆ پێکهێنانی کابینەی نوێی حکومەتی هەرێمی کوردستان لە لایەن یەکێتی و پارتییەوە بەردەوامییان هەیە و تائێستا بۆ ئەو مەبەستە وەفدی دانوستکاری هەردوولا چەندین جار کۆبوونەتەوە و وتەبێژی یەکێتیش ڕایدەگەیەێت:"ئێمە لە یەکێتی نیشتیمانی کوردستان پێمانخۆشە کە هەرچی زووە کابینەی نوێی حکومەت پێکبێت
سەعدی ئەحمەد پیرە وتەبێژی یەکێتی نیشتیمانی کوردستان بۆ ڕوانگە ڕایگەیاند:" لەو کۆبونەوانەی کە کراوە هەنگاوی باشنراوە و دیسانەوە دوای تەواوبوونی پشوەکانی جەژن دیسانەوە کۆبوونەوەکان دەستپێدەکاتەوە.
وتیشی:"ئەو بابەتانەی کە پێویستبوون گفتوگۆیان لەبارەوە بکرێت هەموویان تەواوبوون و ڕەشنوسێک هەیە، ئەو ڕەشنوسە هەمووی تەواوبووە و هەردولا ڕێککەوتنی لەسەردەکەن و ئەوکات دەکەونەسەر هەنگاوەکانی دوای ئەوە.
لە وەڵامی ئەو پرسیارەی کە ئایە چاوەڕێ دەکرێت بەمزوانە کابینەی نوێی حکومەت پێکبێت؟
سەعدی ئەحمەد پیرە وتەبێژی یەکێتی ڕونیکردەوە:"ئەوە پرسیارێکی گەلێک قورسە، چونکە دیاریکردنی کاتێک بۆپێکهێنانی کابینەی نوێی حکومەت ئەوە ئەرکی ئەو لایەنەیە کە کاری لەسەردەکات، بەڵام ئێمە لە یەکێتی نیشتیمانی کوردستان پێمانخۆشە کە هەرچی زووە کابینەی نوێی حکومەت پێکبێت.