ڕوانگە - هێزە سەربازییەکانی جێگیرکراو لە گەڕەکی ئەشرەفیە و شێخ مەقسود دەستیان بە کشانەوە کردووە بۆ ناوچەی ڕۆژهەڵاتی فورات.
دواینیوەڕۆی ئەمڕۆ ئاژانسی هاوار نیوز بڵاویکردەوە" ئەمڕۆ هەینی هێزە سەربازییەکانی هەسەدە لە گەڕەکی ئەشرەفیە و شێخ مەقسود لە شاری حەلەب کشاونەتەوە، ئەمەش وەک جێبەجێکردنی ئەو ڕێککەوتنەی کە لە نێوان ئەنجومەنی گشتی گەڕەکی شێخ مەقسود و ئەشرەفیە و دەسەڵاتدارانی دیمەشق ئەنجامدراوە".
دوێنێ پێنج شەممە بڕگەی یەکەمی ڕێککەوتنی نێوان هەردوولا جێبەجێکرا کە ئازادکردنی ١٤٦ زیندانی و ٩٧ ئەندامی حکومەتی دیمەشقی لە خۆگرتبوو.
لە جێبەجێکردنی ماددەی شەشەمی ڕێککەوتنەکەدا کە تێیدا هاتووە" هێزە سەربازییەکان بە چەکەکانیانەوە لە هەردوو گەڕەکەکەوە بەرەو ناوچەی ڕۆژهەڵاتی فورات دەکشێنەوە و هێزە نیزامییەکان بە کەرەستەی خۆیانەوە ئەو دوو گەڕەکەیان بەجێهێشت و بەرەو ڕۆژهەڵاتی فورات ڕۆیشتن".
هەروەها یەکینەکانی پاراستنی گەل و ژنان یەپەگە لە بەیاننامەیەکدا پشتڕاستیکردەوە کە لە گەڕەکی ئەشرەفیە و شێخ مەقسود کشاونەتەوە، هەروەها پاراستنی ئەو دوو گەڕەکەشیان ڕادەستی هێزەکانی ئاسایشی ناوخۆ کردووە.
ڕۆژی ١ی نیسان ڕێککەوتنێک لە نێوان جڤاتی گشتی گەڕەکی شێخ مەقسود و ئەشرەفیە و دەسەڵاتدارانی دیمەشق ئەنجامدرا کە تێیدا ١٤ بڕگەی لە خۆگرتبوو.