ڕوانگە - لە وتوێژی لەگەڵ پەیامنێری ڕوانگە، لەبارەی بڕیاری هەڵوەشاندنەوەی پەکەکە و دەرئەنجامەکانی ئەو بڕیارە و هەڵوێستەکانی تورکیا دوای چەکدانانی پەکەکە، لوقمان حەسەن چاودێری سیاسی ڕایگەیاند: «لەماوەی ٤١ ساڵی شەڕی چەکداری لەنێوان پارتی کرێکارانی کوردستان و دەوڵەتی تورکیا، هەردولا گەیشتبونە قۆناغێکی بنبەست، بەڵام ئۆجەلان بەو پەیامەی کە لە ٢٧ی مانگی شوباتدا ئاراستەی کۆنسەی سەرۆکایەتی کەجەکە و سەرانی پەکەکەی کرد هەردو لایەن واتە پەکەکە کە ڕابەرایەتی گەلی کوردبکات لە باکوری کوردستان بە هاوتەریبی لەگەڵ دەمپارتی وە دەوڵەتی تورکیاش لە بەرامبەردا وە گەلی کورد لە باکوری کوردستان، ئەم دولایەنە گەیشتبونە ئاستێک تەنانەت لەسەر ناوهێنانی ئۆجەلان خەڵک دەخرایە زیندان و بە سەدان هەزار خەڵک سزاداون و لەماوەی ئەم ٤١ ساڵەدا بەهەزاران خەڵک شەهیدکراون.»
وتیشی: «ئەم پەیامەی ئۆجەلان دەرەچەیەکە بۆئەوەی لەو بازنە داخراوە سیاسەتی سڕینەوە و قڕکردنی کورد کۆتایی پێ بێت، وە دەرگاو دەروازە و ڕێ و ڕێبازێکی نوێی خولقاند، لەبەرئەوە ئەم کۆنگرەی خۆهەڵوەشاندنەوە و چەکدانانەی پەکەکە،بڕیارێکی زۆر حەکیمانەبوو وە کۆنگرەیەکی سەرکەوتوو بوو بۆ قۆناغەکە پێویستییەکی مێژووی بوو، دەرهاویشتەو لێکەوتەو بەرهەمەکانی ئەم کۆنگرەیە لە داهاتوودا دەردەکەوێت، چونکە ئێستا تۆپەکە بەتەواوەتی لە ساحەی دەوڵەتی تورکیادایە و لەمە بەدواوە تەواوی دیمەنی سیاسی لە تورکیادا دەبێت گۆڕانکاری بەسەردابێت و دەبێت دەوڵەتی تورکیا بە ئەرکی مێژووی خۆی هەستێت، چونکە ئیتر شتێک نەما بەناوی پەکەکە و وە ئەوانەی تۆمەتبارکراون بە پەکەکە بە بەڕێز ئۆجەلانیشەوە کە لە زینداندایە، بۆیە دەبێت تورکیا هەنگاوی پراکتیکی بنێت و دەبێت چارەسەر بۆ کۆی پرسەکان بدۆزێتەوە، چونکە پەکەکە ئەرکی سەرشانی خۆی جێبەجێ کرد و ئیدی خەبات لە شەقامی کوردیدا بەشێوەیەکی مەدەنی و یاسایی بەردەوام دەبێت و بیانوی بەتیرۆرناساندنی هەرتاکێکی کورد لە تەواوی تورکیا کۆتایی پێهات، لەبەرئەوە ئەمە قۆناغێکی زۆرگرنگە و دەبێت تێگەیشتنمان بۆی هەبێت، هەرچەندە ڕاستە پەکەکە بڕیاری چەکدانانی داوە لەبەرئەوە قۆناغەکە قۆناغی چەک نییە و قۆناغی خەباتی مەدەنی و یاساییە و ئۆجەلان خۆی وتی؛ پرۆسەی شەڕگۆڕینە بۆ پرۆسەی یاسایی و سیاسی.»
لە وەڵامی ئەو پرسیارەی کە ئایە بڕیاری چەک دانان واتە چۆڵکردنی قەندیل و پڕکردنەوەی بەهێزێکی دیکە، یاخود نەخێر پەکەکە لە قەندیلەوە جۆرێکی دیکە لە خەباتی مەدەنی نوێ دەستپێدەکات؟ لوقمان حەسەن ڕونیکردەوە:«قەندیل بە فەرمی بەشێکە لە خاکی عێراق و ئەو سنورە هەڵنەوەشاوەتەوە، ئەوناوچانەی کە پەکەکە تیایدا نامێنێت و هەیمەنە و هەژمونی پەکەکەی تیادا نامێنێ هێزی پاسەوانی سنور هەیە و لە هەمو ناوچەکاندا بڵاوەی پێدەکرێت و ئەو ناوچانەی سەربە پارێزگایی دهۆک و هەولێرە لەوێ پارتی و حکومەتی هەرێم باڵادەستە، وە ئەو ناوچانەشی سەر بە پارزگای سلێمانییە یەکێتی تیایدا باڵادەستە، هەموو ئەوناوچانە هێزی پێشمەرگەی تێدا جێگیردەکرێت، بۆیە چۆڵکردنی قەندیل بەوجۆرەنییە کە ئێمە لە ئێستاوە سڵی لێبکەینەوە و ئیدی تورکیا ناتوانێت داخلی ئەو ناوچانە ببێت و یەکێک لەخاڵە بەهێزەکان ئەوەیە ئەبێ هێزەکانی تورکیاش لە عێراق کۆتایی پێ بێت، چونکە ئەو بیانوەی نەماوە و دەبێت ئەو ناوچانە ژیانی ئاسایی بۆ بگەڕێتەوە.»
لەبارەی ئەوەی کە هەمیشە پەکەکە دەستپێشخەربووە بۆ ئاشتی، بەڵام تورکیا ئەو بەڵێنەی شکاندووە و پابەندی ڕێککەوتن نەبووە، ئایە ئەمجارەش هەمان سینارۆ دووبارە نابێتەوە؟ لوقمان حەسەن چاودێری سیاسی ئەوەی خستەڕوو:«بارودۆخ زۆر گۆڕاوە ئەگەر بڕوانین لە بارودۆخی ناوچەکە، گۆڕانکاریەکانی ناوچەکە لەدوای ڕوخانی سەدام حسین و هاتنی بەهاری عەرەبی دەوڵەت نەتەوە بەوشێوازەقەبە و گەورە و بەهێزیەی خۆی نەماوە و سوریا و عێراق باشترین نمونەن و مۆدێلی دەوڵەت نەتەوە کۆتایی پێهاتووە و ئەو دەوڵەت نەتەوەی کە بەرهەمی کەپیتاڵیزمی جیهانی بوو لەدوای سایکسبیکۆ و لۆزانەوە بنیاتنراوە ئەوەتا یەک لەدوای یەک وەکو پولی دۆمینە دەڕوخێن، ئەم نامەیەش گەیشتووە بە سەرانی تورکیا و بە وڵاتانی دیکەش، لەبەرئەوە تورکیا ناتوانێت بەوشێوەیە ڕەفتاربکات، چونکە تورکیا لەناوخۆیدا کۆمەڵێک کێشەی زۆر گەورەی هەیە، ئەگەر بە وردی لە بابەتەکە بڕوانین دەبینین شەڕی پەکەکە و دەسەڵاتدارانی تورکیا بابەتێک بوو هەمیشە وەک ئامرازێک بۆ خەڵەتاندنی گەلانی تورکیا بەکاری دەهێنا و درێژەی بەم سیاسەتە چەوتانەی خۆی دەدا، لەبەر ئەوە کەئەمە نەما ئیدی تورکیا چۆن دەتوانێ ئەو سیاسەتە قێزەونە پەیڕەو بکات، وە لەناو تورکیا جۆرێک لە دیموکراسی و ئۆپۆزیسۆنی کاراهەیە لەبەرامبەر دەسەڵاتدارانی تورکیا و چەندان حیزبی دیکەهەیە بەشدارییان پێکراوە لەم پرۆسەیەدا و وە لایەنی سێیەمیش بەشدارە لەم پرۆسەیەدا، بەڵام ڕەنگە ڕانەگەیەنرابێت و بەشێوەیەکی نهێنی مابێتەوە، ئەویش بریتییە لەو هێزانەی کە لەناوچەکەداهەژمونیان هەیە وەکو ئەمەریکی و ئەوروپییەکان، لەبەرئەوە تورکیا دەبێت نەهجی سیاسی خۆی بگۆڕێت وە ئەگەر ئەو هەنگاوە نەنێت ئەوکات قسەی دیکە هەیە و کورد و ئەندامانی پەکەکە لەناو نەچون و لەناوناچن، بۆیە باوەڕناکەم تورکیا ئیدی بتوانێت بگەڕێتەوە بۆ چوارگۆشەی یەکەم و وەک سەردەمی پێش دروستبونی پەکەکە سیاسەتی قڕکردن و لەناوبردنی گەلی کورد پەیڕەوبکات، چونکە لەسەر ئاستی جیهانی و هەرێمیش سەردەمەکە گۆڕانکاری بەسەردا هاتووە.»