ڕوانگە - لە وتوێژی لەگەڵ پەیامنێری ڕوانگە، لەبارەی گرنگی و ڕۆڵی ڕێکخراوەکانی بواری ژینگە، لە هەرێمی کوردستان و ئاستی هۆشیاری خەڵک بەرامبەر بەژینگە و هەروەها پەیامی ئەوان لە ڕۆژی جیهانی ژینگەدا، مەعروف مەجید، سەرۆکی ڕێکخراوی ئایندە بۆ پاراستنی ژینگە، ڕایگەیاند:"پەیامی ئێمە بۆ هاوڵاتیان بە گشتی، ژینگە بە ماڵی خۆیان بزانن شێواندنی ژینگە واتە شێواندنی ژیانی خۆیان و نەوەکانی داهاتوویان، ناکرێ بۆ چەند ساتێکی کەمی ژیان ئێمە ببینە هۆکاری شێواندنی ژینگە بە گشتی، ئاماژەی بەوەشکرد، هەر کەس و لە ئاستی خۆی دەتوانێ ببێتە پارێزەر و خەمخۆری ژینگە، کەس نەڵێ من بە تەنها هیچم پێ ناکرێ هەر کەسێک لە ئاستی خۆی تەنها ژینگە پیس نەکا گەورەترین خزمەتی بە ژینگە کردووە.'
لەبارەی هۆشیاری خەڵک و هەوڵاتیان بەگشتی بەرامبەر بە ژینگە، مەعروف مەجید ڕونیکردەوە:" هۆشیاری خەڵکی بەراورد بە ڕابردوو گۆڕانی بەسەردا هاتووە بە ئەرێنی، هەندێ دیاردەی نەشیاو پێشتر هەبوو ئێستا کەمیان کردووە، وەکو جگەرەکێشان لە شوێنەگشتییەکان و فڕێدانی پاشماوەکان لەناو ئۆتۆمبیلەکان و چەندین بابەتی تر، زۆرینەی خەڵکی بۆ ژینگەیەکی خاوێن پەنا بۆ ڕوواندنی نەمام دەبەن، ئەوەی ئێمە بینیومانە گرنگی بەو کەلوپەلانە دەدەن کە دۆستی ژینگە، ئەمانەش مایەی خۆشحاڵییە بۆ هۆشیاری گشتی تایبەت بە ژینگە.'
لەبارەی ڕۆڵی ڕێکخراوەژینگەیان لە هەرێمی کوردستان، سەرۆکی ڕێکخراوی ئایندە بۆ پاراستنی ژینگە ئەوەی خستەڕوو:"ڕێکخراوەکان چاودێری کارەکانی حکومەت و خەڵکن، هەر بۆیە زیاتر کاری هۆشیاری و چاودێری دەبینن، بەپێی کات و شوێن هەر ڕێکخراوە خزمەتی بە ژینگە گەیاندووە دەشکرێ زیاتر بکرێ خزمەتەکان لەبەر ئەوەی لە هەرێمی کوردستان نزیکهی ۲٤٥ ڕێکخراوی ژینگەیی بوونی هەیە جگە لە کۆمەڵە وسەنتەر و گرووپەکان، هەروەها لە سێکتەری گشتی ژینگە، کشتوکاڵ، ژینگە، ئاو، هەمەجەشنە زیندووەکان، گەشتیاری، زیاد لە ٤٥۰ ڕێکخراو بوونی هەیە.کەواتە بە پێی ژمارەکان ڕۆڵیان ونە لە خزمەتکردنی ژینگە.'
مەعروف مەجید، سەرۆکی ڕێکخراوی ئایندە بۆ پاراستنی ژینگە باسی لەوەکرد:"دەبێ هەر تاکێک لە ئاستی خۆی خۆی بە بەرپرسیار بزانێ بەرامبەر ژینگە، گۆڕانی کەش و هەواو وگرفت ژینگەییەکان وڵاتی ئێمەشی گرتۆتەوە و زیانی گەورەی لێداوە، ئەگەر خۆمان ڕەحم بە خۆمان نەکەین ئەوا دڵنیابن ژینگە و سرووشت ڕەحممان پێناکات.'