وەزارەتی پێشمەرگە چۆن وەڵامی خلوسی ئاکاری داوەتەوە؟

وەزارەتی پێشمەرگەی حکومەتی هەرێمی کوردستان لە وەڵامی لێدوانێکی وەزیری بەرگری تورکیا ڕایگەیاندووە کە خۆی سەردانی هەرێمی کوردستانی کردووە، باشترە بڵێت ئەو شوێنە سەردانی کردووە، کوێیە و ناوی چییە؟

لە بەیاننامەیەکی وەزارەتی پێشمەرگەی حکومەتی هەرێمی کوردستاندا هاتووە کە لێدوانەکەی خلوسی ئاکار بۆ ئینکارکردنی کوردستان بووەتە جێی سەرسوڕمان و نابێت کەسێک لە پێگەیەکی فەرمی وەهادا ئینکاری ڕاستییەکی مێژوویی و جوگرافی و دیمۆگرافی بکات.

لە درێژەی ئەو بەیاننامەیەدا هاتووە کە ئەگەر ئەو بەڕێزە گومانی لە بوونی جوگرافیای کوردستان هەیە با ئاوڕێک لە بەڵگەنامە و مێژووی عوسمانییەکان بداتەوە و بۆی دەردەکەوێت کوردستان بوونی هەیە یان نە.

وەزارەتی پێشمەرگە جەختیکردووەتەوە کە عەقڵییەتی ئینکارکردنی گەلێک و جوگرافییەکەی هەمیشە سەرچاوەی کێشە و گرفتەکان بووە و بە هیچ ئەنجامێک ناگات./.