جەعفەر شێخ مستەفا: دەسەڵاتدارانی هەرێم ئەوە نابینن قەزافی و سەدام چییان لێهات

جێگری سەرۆکی هەرێمی کوردستان ڕایگەیاند کە دۆخی ئەم ناوچەیە لە پاش شەڕی ناوخۆ هێندە خەراپ نەبووە.

جەعفەر شێخ مستەفا لە چاوپێکەوتنی کەناڵی کوردستان وتی کە دۆخی هەرێمی کوردستان و نێوانی پارتی و یەکێتی لە پاش شەڕی ناوخۆ هێندەی ئێستا خەراپ نەبووە و گەیشتووەتە لێکترازان و لەناوقەددا یەکتر بڕینەوە.

ناوبراو وتی: پارتی دەیەوێت یەکێتییەکی لاوازی لە بەردەستدا بێت و یەکێتی ئەمەی قبووڵ نییە و کاتی ئەوە هاتووە پێی بڵێ ستۆپ.

جێگری سەرۆکی هەرێمی کوردستان وتی کە هاوپەیمانان بێزارن لە دەسەڵاتی هەرێم و لاپەڕەیەکی زۆر ڕەشمان لای ئەوان هەیە، هەموو خەراپەکارییەک لەم هەرێمە هەیە بە چی ئەوان لێمان ڕازی بن.

جەعفەر شێخ مستەفا وتی: لە بەرنامەی سەرکردایەتی کورددا ئەوەی بوونی نەبێت خزمەتی خەڵکە، دەسەڵاتدارانی هەرێم ئەوە نابینن قەزافی و سەدام چییان لێهات./.