بافڵ تاڵەبانی بۆچوونی خۆیی لە سەر هێرشەکەی ماڵی کازمی ئاشکرا کرد

هاوسەرۆکی یەکێتی نیشتمانی کوردستان وێڕای ئیدانەکردنی هێرشەکەی سەر ماڵی سەرۆک وەزیرانی عێراق، بە مایەی نیگەرانی قووڵ ناوی بردووە.

بافڵ تاڵەبانی پەیامێکی بڵاو کردەوە و ڕایگەیاند کە بە توندی ئیدانەی ئەو هێرشە تیرۆریستییە دەکات کە کراوەتە سەر ماڵی مستەفا کازمی لە بەغدا.

ناوبراو وتی: هەر کارێکی تاوانکاری دژ بە سەقامگیری سیاسی، ئاشتی و پێکەوەژیان بێت ڕوبەڕوی دەبینەوە و بە هەموو هێزێکەوە کار دەکەین بۆ سەروەری و سیادەی عێراق و هەرێمی کوردستان.

تاڵەبانی وتی: ئەم ڕووداوە پێمان دەڵێت کە پێویستە هێز و لایەنە سیاسییە براوەکانی کوردستان و عێراق پێکەوە لە سەر بنەمای دەستوور و بەرژەوەندی هاوبەش کار بکەن بۆ پێکهێنانی حکومەتێکی چاکساز و خزمەتگوزار و ڕوبەڕوبونەوەی ئەوانەی پێشێلی یاسا دەکەن و دەبنە ئاستەنگ لە بەردەم پێشکەوتنی وڵات./.