هاوپەیمانییەکەی عەلاوی هەڵوێستێکی نوێی لە سەر ئەنجامی هەڵبژاردنەکانی عێراق ڕاگەیاند

ئەو هاوپەیمانییەکەی کە ئەیاد عەلاوی سەرۆک وەزیرانی پێشووتری عێراق سەرکردایەتی دەکات، جارێکی دیکە دژایەتی خۆیی بۆ ئەنجامی هەڵبژاردنە پەرلەمانییەکەی ئەم وڵاتە دووپات کردەوە و ڕایگەیاند کە ئەم ئەنجامە تەنیا ناکۆکییە سیاسییەکان زیاتر دەکات.

هاوپەیمانی وەتەنیە لە بەیاننامەیەکدا ئەنجامی ڕاگەێندراوی هەڵبژاردنەکانی عێراقی ڕەتکردەوە و هۆشداریی لە سەر تێکچوونی دۆخی سیاسی و کۆمەڵایەتی و ئەمنی ئەم وڵاتە داوە.

لەو بەیاننامەیەدا هاتووە کە دۆخەکە لە ژێر کۆنتڕۆڵ دەرچووە و ئەمەش پێشبینی کراو بووە و هیچ دامەزراوەیەک ئامادەیی بۆ دۆخێکی وەها نییە.

وەتەنیە ڕایگەیاندووە لە لە چوارچێوەی یاسادا دژایەتی خۆی بۆ ئەنجامی هەڵبژاردنەکان بەردەوام دەکات.

ڕاشیگەیاندووە کە چاودێرانی بیانی تەنیا سەیرکەرێک بوون و هیچ ڕۆڵێکیان لە ڕێگری لە دزینی ملیۆنان دەنگی خەڵکی عێراقدا نەبووە و ئەم هەڵبژاردنانەش ناتوانێت ساڕێژی زامی عێراقییەکان بکات و تەنیا دەسپێکی داهاتوویەکی مەترسیدارە./.