نەوەی نوێ بە کام لادا دەڕوات، پارتی یان یەکێتی؟

جوڵانەوەی نەوەی نوێ بە سەرۆکایەتی شاسوار عەبدولواحید لە هەڵبژاردنەکانی سەرۆکایەتی کۆماری عێراق ڕۆڵی گرنگ دەبینێت، ئەمەش بۆ ئەو هاوپەیمانییە دەگەڕێتەوە کە لە پەرلەمانی عێراق بووەتە خاوەنی 28 کورسی و دەتوانێت کاندیدی هەر یەک لە پارتی و یەکێتی بۆ پۆستی سەرۆک کۆمار یەکلایی بکاتەوە.

بەدەر لە بابەتی دەنگدان بە هەر یەک لە کاندیدی پارتی و یەکێتی، نەوەی نوێ ڕۆڵی لە بەڕێوەچوون یان پەکخستنی دانیشتنی پەرلەمان بۆ هەڵبژاردنی سەرۆک کۆمار دەبێت. هەڵبژاردنەکە پێویستی بە 220 ئەندامی پەرلەمان هەیە، لە هەڵبژاردنی دەستەی سەرۆکایەتی پەرلەمان بە هاوپەیمانییەکەی سەدر و حەلبوسی و بارزانی و ئەوانەوە کە بەشدار بوون، 228 ئەندام بوون، نەوەی نوێ و هاوپەیمانی لە پێناو خەڵک دەتوانن ئەو نیسابە بشکێنن و دانیشتنەکەی پەرلەمان پەکبخەن.

دەوترێت کە پارتی و یەکێتی داوای پاڵپشتییان لە نەوەی نوێ و هاوپەیمانییەکەی کردووە. تا ئێستا دیار نییە کە دەنگیان بۆ کاندیدەکەی پارتی دەبێت یان یەکێتی، یان ئەوەی کە بەشداریی دانیشتنەکەی پەرلەمان دەکەن یان نە؟/.