شاسوار عەبدولواحید چەند مەرجێکی قورسی خستە بەردەم پارتی و یەکێتی

سەرۆکی جوڵانەوەی نەوەی نوێ بۆ دەنگدان بە کاندیدی هەر یەک لە پارتی و یەکێتی لە هەڵبژاردنەکانی سەرۆک کۆماری عێراق، چەندین مەرجی گرنگ و قورسی خستە بەردەم دەسەڵاتدارانی ئەو دوو حیزبە و مەرجەکانیش پەیوەندییان بە مووچە و خزمەتگوزارییەکانی خەڵکەوە هەیە.

شاسوار عەبدولواحید لە پاش کۆبوونەوەی ئەنجومەنی نەوەی نوێ لە کۆنگرەیەکی ڕۆژنامەوانیدا ئەو مەرجانەی خستەڕوو کە بریتین لە:

هەرزانکردنی نرخی غاز بۆ هاووڵاتیان.

لابردنی باج لە سەر هاووڵاتیان و دوکانداران و کۆمپانیاکان.

درووستکردنی ژمارەی بانکی بۆ مووچەخۆران و مانگانە گەڕانەوەی بەشێک لەو مووچەی بۆیان پاشەکەوت کراوە لە ڕێی ئەو ژمارە بانکییەوە.

دەستپێکردنەوەی پلەبەرزکردنەوەی فەرمانبەران.

چارەسەرکردنی مادەی 140 و ناوچە کێشە لە سەرەکان و زامنکردنی بەشە بودجەی هەرێم.

دابینکردنی دەرماڵەی خوێندکارانی زانکۆ و پەیمانگاکان.

مووچەی خانەنشینان هەموو مانگێک لە ڕێی کارتی بانکییەوە بگاتە دەستیان.

هەڵبژاردنەکانی هەرێمی کوردستان لە کاتی خۆیدا بەڕێوە بچێت.

هەموارکردنەوەی یاسای هەڵبژاردنەکان و ئەندامانی کۆمیسیۆنیش لە کەسانی بێلایەن بن./.