ئەمریکا: هێزەکانمان لە سوریا و عێراق دەمێننەوە
(0) /
سەرەڕای ڕێکەوتنی نێوان بەغدا و واشنتن بۆ کشانەوەی هێزەکانی ئەمریکا تا کۆتایی 2021، دیپلۆماتکارێکی ئەمریکی ڕایگەیاند کە هێزەکانی ئەو وڵاتە لە سوریا و عێراق دەمێننەوە.
جوئی هود یاریدەدەری وەزیری دەرەوەی ئەمریکا بۆ کاروباری ڕۆژهەڵاتی نزیک، سەبارەت بە ئەگەری دووبارەکردنەوەی سیناریۆی ئەفغانستان لە سوریا و عێراق وتی: بە ڕوونی دەڵێم کە ئەفغانستان نە سوریایە و نە عێراق. عێراق وڵاتێکی تایبەتە، ئێمە لەم وڵاتەدا بەرژەوەندی خۆمان هەیە.
ناوبراو وتی: ئەرکەکانی ئێمە لە ئەفغانستان کۆتایی هات بەڵام بەرژەوەندییەکانمان لە عێراق دەمێنێتەوە و ئەمەش تەنیا بواری ئەمنی لە خۆ ناگرێت بەڵکوو هاوکاریکردنی هێزەکانی عێراق و هەسەدە لە سوریا بۆ لەناوبردنی تەواوی داعش لە خۆ دەگرێت و ئەمەش پابەندی کاتێکی دیاریکراو نابێت.
ئەو بەرپرسەی وەزارەتی دەرەوەی ئەمریکا وتی کە کشانەوەی هێزەکانمان لە سوریا و عێراق لە داهاتوویەکی نزیکدا ڕوو نادات.
وتیشی کە ڕەنگە ئەرکی هێزەکانمان لە عێراق لە شەڕکردنەوە بۆ مەشق و ڕاهێنان بگۆڕدرێت بەڵام سەرۆک کۆماری ئەمریکا بە ڕاشکاوانە باسیکردووە کە هێزەکان لە سوریا و عێراق دەمێننەوە./.
تێبينيێك بنێرە: