بافڵ تاڵەبانی بەڵێنی چی بە خەڵکی سلێمانی داوە؟

هاوسەرۆکی یەکێتی نیشتمانی کوردستان لە یادی دامەزراندنی سلێمانی پەیامێکی بڵاو کردەوە.

بافڵ تاڵەبانی لە پەیامەکەیدا بەڵێنی بە خەڵکی سلێمانی داوە کە گۆڕانکاری ڕیشەیی لە کەرتی خزمەتگوزارییەکان و سەرجەم لایەنەکانی دیکەی بکاتە پێشینەی کارەکانی.

لە پەیامەکەی هاوسەرۆکی یەکێتیدا هاتووە: بەڵێن دەدەم کە سلێمانی بکەینەوە بەو شارەی کە نەک تەنیا بۆ خەڵکەکەی بەڵکوو بۆ هەموو تاکێکی ئەم نیشتمانە جێی شانازی بێت. شارێک بێت بە باڵای ناسنامەکەی کە پایتەختی ڕۆشنبیری و شاری هەڵمەت و قوربانییە، خزمەت بکرێت.

ناوبراو ڕایگەیاندووە کە بە هەموو هێزێکەوە هەوڵی کۆتایی هێنان بە پەراوێزخراوی و کەموکوڕییەکانی سلێمانی دەدات و گۆڕانکاری ڕیشەیی لە کەرتی خزمەتگوزاری و سەرجەم لایەنەکانی دەکرێت.

بافڵ تاڵەبانی جەختی لەوەش کردووەتەوە کە پاراستنی گیان و ئاسایشی تاک بە تاکی خەڵک ئەرکی سەرشانی دەبێت./.