بافڵ تاڵەبانی بڕیارە هێز بەرەو کوێ بنێرێت؟

هاوسەرۆکی یەکێتی نیشتمانی کوردستان ڕایگەیاند کە کۆمپانیاکان خەریکە کێڵگە نەوتییەکانی گەرمیان جێدەهێڵن و ئەویش بە هۆی بوونی چەندین مافیا و چەکدارێکەوەیە و بڕیار دراوە کە هێزێک ڕەوانەی ئەو ناوچەیە بکرێت.

ئەمە وتەی بافڵ تاڵەبانییە لە میانەی کۆبوونەوەی لە گەڵ ژمارەیەک لە خوێندکارانی زانکۆ و لە وەڵامی پرسیاری خوێندکارێکدا بووە لە سەر دیارنەمانی داهاتی گەرمیان.

پرسیاری خوێندکارەکە ئەوە بووە کە داهاتی کێڵگەی نەوتی حەسیرە و خاڵە سنورییەکان چی لێدێت، بۆ لە خزمەتی خەڵکی سنورەکەدا نییە؟

هاوسەرۆکی یەکێتی لە وەڵامدا وتی: تۆ بۆ ناڵێیت ئەم هەموو نەوتەی تر هەیە لە گەرمیان بۆ کۆمپانیاکان دەریناهێنن، چەند مافیا و چەکدارێک هەیە و ناوچەکەیان کۆنتڕۆڵ کردووە و خەریکە کۆمپانیاکان دەڕۆن و ئەو تۆزە داهاتەش کە هەیە نامێنێت.

وتیشی کە لە لای پارتی وا نییە و کەس ناتوانێت شتی وا بکات، بە نیازم لەم یەک دوو هەفتەیەدا هێزێکی سەربازی بنێرمە ناوچەکە./.