پارتی: بە یەک کاندید دەچینە هەڵبژاردنەکانی سەرۆک کۆمارەوە

پارتی دیمۆکراتی کوردستان بە ئاماژە بەوەی کە کورد بە یەک کاندیدەوە دەچێتە هەڵبژاردنەکانی سەرۆک کۆماری عێراقەوە، پێشبینی ئەوەیکرد کە حکومەتی نوێی عێراق بە بەشداری هاوپەیمانی سیادە و چوارچێوەی هەماهەنگی پێک بهێندرێت.

شیروان دوبەردانی ئەندامی فراکسیۆنی پارتی لە پەرلەمانی عێراق ڕایگەیاند کە پارتی هێشتا پێداگرە لە سەر کاندیدبوونی ڕێبەر ئەحمەد بۆ پۆستی سەرۆک کۆمار و لە بەرامبەردا یەکێتی نیشتمانی کوردستانیش هەمان تێڕوانینی لە سەر کاندیدبوونی بەرهەم ساڵح هەیە بەڵام هەوڵ و پەیوەندی بۆ گەیشتن بە ڕێکەوتنی دەستنیشانکردنی کاندیدی هاوبەشی هەر دوو لا دەستیپێکردووە.

ناوبراو وتی کە کاندیدەکەی پارتی زیاترین شانسی گەیشتنی بە سەرۆک کۆماریی عێراق هەیە و مەسعود بارزانیش جەختی لە سەر ئەوە کردووەتەوە کە کورد بە یەک کاندیدەوە بچێتە هەڵبژاردنەکانی سەرۆک کۆمارەوە.

دوبەردانی وتی: بارزانی جەختی لە سەر سێ بنەما کردووەتەوە، هاوبەشی، ڕێکەوتن و هاوسەنگی، ئێمە لە سەر ئەم سێ بنەمایە دەچینە دانوستانەکانی تایبەت بە پێکهێنانی حکومەتەوە و سەرجەم لایەنەکان بە چوارچێوەی هەماهەنگی و هاوپەیمانی عەزم و سیادەشەوە پابەندی ئەم بنەمایانەن./.