کازمی لە کۆبوونەوەی لوتکەی سعوودیە بەشداری دەکات

نووسینگەی سەرۆک وەزیرانی عێراق ڕایگەیاندووە کە مستەفا کازمی لە کۆبوونەوەی لوتکەی سعوودیە بەشداری دەکات.

ئەو کۆبوونەوەش بە بەشداری جۆبایدن سەرۆک کۆماری ئەمریکا، سەرۆکی وڵاتانی ئەندام لە ئەنجومەنی هاریکاری کەنداوی فارس و سەرۆکی هەر یەک لە وڵاتانی عێراق، میسر و ئەردەن بەڕێوە دەچێت.

لە ڕاگەێندراوێکی نووسینگەی مستەفا کازمیدا هاتووە کە بەشداریی ناوبراو لە کۆبوونەوەکەی سعوودیە لە سەر بانگهێشتی شای ئەو وڵاتە و بە ئامانجی دوورخستنەوەی عێراق لە جەمسەربەندییەکانی ناوچەکە دەبێت.

ڕاگەێندراوەکە ئاماژەی بەوە داوە کە تەوەری سەرەکیی ئەو کۆبوونەوە، پرسی وزە، ئاسایشی خۆراک و گۆڕانکارییەکانی کەشوهەوا دەبێت. ئەمەش لە کاتێکدایە باس لەوە دەکرێت ئەو کۆبوونەوە بۆ پێکهێنانی بەرەیەکی هاوبەش لە گەڵ ئیسرائیل و دژ بە ئێران و بەرەی خۆڕاگرییە لە ناوچەکە./.