قوباد تاڵەبانی: هەموو هەوڵێكمان بۆ ئەوەیە هەڵبژاردن لە نزیكترین دەرفەتدا و لە ئەمساڵدا بكرێت
(0) /
ڕوانگە - قوباد تاڵەبانی، جێگری سەرۆك وەزیران لەگەڵ بنیامین هانا، جێگری كونسوڵی گشتیی ئەڵمانیا لە هەرێم كۆبووەوە و لە كۆبوونەوەكەدا لەبارەی هەڵبژاردنی پەرلەمانی كوردستان و بابەتی دەستپێكردنەوەی هەناردەكردنەوەی نەوتی هەرێم و چەند پرسێكی دیكەی جێی بایەخی هەردوولا گفتوگۆكرا.
لە دەستپێكی كۆبوونەوەكەدا كە رۆژی چوارشەممە لە هەولێر بەڕێوەچوو، جێگری سەرۆك وەزیران، جەختیكردەوە كە هەموو هەوڵێكمان بۆ ئەوەیە هەڵبژاردن لە نزیكترین دەرفەتدا و لە ئەمساڵدا بكرێت.
سەبارەت بە كورسیی كۆتاكان، قوباد تاڵەبانی روونیكردەوە كە بێ جیاوازی داكۆكی لە هەموو مافی پێكهاتەكان دەكەین، وتیشی، "هیچ كاتێك دژی كورسیی كۆتای پێكهاتەكان نەبووین و ناشبین، بەڵكو خواست و هەوڵی ئێمە ئەوەیە پێكهاتەكان بتوانن نوێنەرایەتیی راستەقینەی خۆیان هەبێت لە پەرلەمانی كوردستان.
لە تەوەرێكی دیكەی كۆبوونەوەكەدا باس لە دەستپێكردنەوەی هەناردەكردنی نەوتی هەرێم و پرسی بودجەی هەرێم كرا و جێگری سەرۆك وەزیران رایگەیاند، حكومەتی هەرێم هەموو ئامادەییەكی نیشانداوە بۆ دەستپێكردنەوەی هەناردەكردنی نەوت و وتیشی ئێمە نابینە كێشە لەبەردەم دەستپێكردنەوەی پڕۆسەكەدا.
سەبارەت بە پرسی بودجە و مووچەی فەرمانبەرانی هەرێمیش، قوباد تاڵەبانی ئاماژەی بەوەدا كە هەنگاوی باش نراوە بە ئاراستەی چارەسەركردنی كێشەكە و وتیشی، "وەفدی حكومەت ئامادەیە سەردانی بەغداد بكات و مەبەستمانە بگەینە رێككەوتنی كۆتایی بۆ چارەسەركردنی یەكجاریی كێشەی بودجە و مووچە.
لە تەوەری كۆتایی كۆبوونەوەكەدا گفتوگۆ كرا لەبارەی بوونیادنانی زانكۆیەكی كوردی ــ ئەڵمانی لە شاری سلێمانی، قوباد تاڵەبانی پشتگیری و ئامادەیی تەواوی حكومەتی هەرێمی دەربڕی بۆ پێشكەشكردنی هەموو كارئاسانییەك بۆ كردنەوەی زانكۆكە.
تێبينيێك بنێرە: