کۆمپانیا ئێرانییەکان لە پێشانگەی گەشتوگوزاری سلێمانیدا بەشدارن

2 كاتژمێر لەمەوپێش

ڕوانگە - کۆنسووڵی ئێران لە سلێمانی دەڵێت، ژمارەیەک کۆمپانیای ئێرانی لە پێشانگەی نێودەوڵەتیی گەشتوگوزاری سلێمانیدا بەشدارن.

محەممەد مەحموودیان، کۆنسووڵی ئێران لە سلێمانی پێنجشەممە 14-11-2024، لە دووەم پێشانگەی نێودەوڵەتیی گەشتوگوزار قسەی بۆ نزار جەزا، پەیامنێری تۆڕی میدیایی رووداو کرد و گوتی: ''پێنج کۆمپانیای جۆراوجۆر و متمانەپێکراوی ئێرانی لە بوارەکانی گەشتوگوزار و گەشتیاریی تەندروستییەوە، لە پێشانگەکەدا بەشدارن.''

محەممەد مەحموودیان گوتی، بەشداریی چالاکی کۆمپانیا ئێرانییەکان لە پێشانگە نێودەوڵەتییەکە، دەرخەری ئەوەیە کە ''ئەوان حەزیان لە پێشکەوتنی کەرتەکانی گەشتوگوزار و گەشتیاریی تەندروستییە لە نێوان هەردوو لایەنی ئێران و هەرێمی کوردستاندا.''

کۆنسووڵی ئێران لە سلێمانی ئەوەشی خستەڕوو، بەهۆی هەبوونی سنووری هاوبەشی نێوانیان، ژمارەیەکی زۆر لە گەشتیاران لە هەرێمی کوردستانەوە دەچنە ئێران. دەشڵێت: ''زمانی هاوبەشی دانیشتووانی کرماشان و سنە لەگەڵ خەڵکی هەرێمی کوردستان، پەیوەندیگرتنی نێوانیانی زۆر ئاسانتر دەکاتەوە.''

محەممەد مەحموودیان لەبارەی قەبارەی بازرگانیی نێوان ئێران و هەرێمی کوردستانیش دەڵێت: ''ژمارەیەکی وردمان لەبەردەست نییە، بەڵام کۆی گشتیی قەبارەی بازرگانی نێوانیان، بەردەوام روو لە زیادبوونە.''

لەبارەی پەیوەندییەکانی پارتی و یەکێتی و پێکهێنانی حکومەتی نوێی هەرێمی کوردستان، کۆنسووڵی ئێران لە سلێمانی وەڵامی پرسیارێکی پەیامنێری رووداوی دایەوە و گوتی: ''ئێران هەموو کات بە دوای ئەوەوە بووە، باشترین پەیوەندی لە نێوان پارتی و یەکێتیدا هەبێت.''

دووەم پێشانگەی گەشتوگوزاری سلێمانی بە ئامادەبوونی دەیان کۆمپانیای گەشتیاریی نێوخۆیی و بیانی، لە گۆڕەپانی پێشانگەی نێودەوڵەتیی تاسلۆجە بەڕێوەدەچێت، بڕیارە سێ رۆژ بەردەوام بێت و رۆژانەش لە کاژێر 11:00 بۆ 18:00 بکرێتەوە.