پارتی هەڵوێستی خۆیی لە سەر کاندیدی سەرۆک کۆمار گۆڕی

پارتی دیمۆکراتی کوردستان ڕایگەیاندووە کە بە هەر کاندیدێک کە لە لایەن یەکێتی نیشتمانی کوردستانەوە بۆ پۆستی سەرۆک کۆماری عێراق دەستنیشان بکرێت دەنگ دەدەن و ناکۆکییەک لە سەر ئەم پرسە نابێت.

عەلی فەیلی ئەندامی پارتی دیمۆکراتی کوردستان بە کەناڵی الفرات ی ڕاگەیاند: ئێمە بۆ پێکهێنانی تیمێکی هاوبەش بۆ دانوستانەکانی تایبەت بە حکومەتی نوێ هاوڕاین، پارتی پێداگرییەکی وەهای لە سەر پۆستی سەرۆک کۆمار نییە و دەنگ بە کاندیدی یەکێتی لە هۆڵی پەرلەمانی عێراق دەدات و لە سەر ئەم پۆستە ناکۆکییەک لە نێوان هەر دوو حیزبی سەرەکیی هەرێمی کوردستان نابێت.

ناوبراو وتی: هەڵوێستی پارتی و مەسعود بارزانی لە ڕۆژی یەکەمی ڕاگەیاندنی ئەنجامی هەڵبژاردنەکانەوە ڕوون بووە و ئێمە تێڕوانینی یەکسانمان لە سەر سەرجەم لایەنەکان هەیە و پاش پەسەندکردنی ئەنجامەکان دەچینە دانوستانەکانی پێکهێنانی حکومەتەوە./.