ڕووسیا کوژرانی 500 سەربازی ئۆکرانیای لە یەک ڕۆژدا ڕاگەیاند

وەزارەتی بەرگری ڕووسیا هەواڵی کوژرانی زیاتر لە 500 سەربازی ئۆکرانیای لە ڕۆژی سێ شەممە ڕاگەیاند.

ئیگۆر کوناشینکۆف وتەبێژی وەزارەتی بەرگری ڕووسیا ئەمڕۆ چوارشەممە 14 ی ئەیلولی 2022 ڕایگەیاند کە لە ئاکامی هێرشی ئاسمانی، مووشەکی و تۆپخانەییەکانی سوپای ئەم وڵاتە لە بەرە جیاجیاکانی شەڕ، لە ڕۆژی ڕابردوو زیاتر لە 500 سەربازی ئۆکرانیا کوژراون.

ناوبراو وتی کە لە ئاکامی هێرشێکی شکستخواردووی هێزەکانی ئۆکرانیا لە بەرەی خێرسون، 8 تانک، 13 ئۆتۆمبێلی سەربازی و 11 ئۆتۆمبێلی دیکەیان لە دەست داوە و 150 کەسی دیکەش کوژراون.

کوناشینکۆف وتی کە لە ئاکامی هێرشی ئاسمانیی ڕووسیا لە ناوچەی زاپۆرۆژیا پێگە و شوێنی جێگیربوونی هێزەکانی ئۆکرانیا کرایە ئامانج و بەو هۆیەشەوە 320 کەس لە هێزەکان کوژران.

بە وتەی ناوبراو، لە سەرەتای شەڕی ئۆکرانیاوە لە 24 ی شوباتی 2022، بە گشتی 293 فڕۆکە، 155 کۆپتەر، 1948 درۆن، 374 سیستەمی دژە مووشەکی، 4921 تانک و ئۆتۆمبێلی دیکەی سەربازی، 835 ڕۆکێت هاوێژ، 3386 تۆپ و 5552 ئۆتۆمبێلی تایبەتی سەربازیی ئۆکرانیا لە ناو براون./.