سوریا: ئەمریکا قەرەبووی زیانەکانمان بۆ بکاتەوە

وەزارەتی دەرەوەی سوریا لە بەیاننامەیەکدا داوایکردووە ئەمریکا بە هۆی داگیرکاری و دەسدرێژی سەربازییەوە قەرەبووی زیانەکانی ئەم وڵاتە بکاتەوە.

لە بەیاننامەکەی وەزارەتی دەرەوەی سوریادا هاتووە کە ویلایەتە یەکگرتووەکانی ئەمریکا و هاوپەیمانەکانی لە جیهان و ناوچەکە، ڕۆڵی بەرچاویان لە شەڕی تیرۆریستی کەم وێنە لە دژی کۆماری عەرەبی سوریا هەیە.

لە درێژەی بەیاننامەکەدا هاتووە کە کردەوەکانی ئەمریکا لە سوریا بە پێچەوانەی یاسا نێودەوڵەتییەکانە و شیاوی ئەوەیە کە لە لایەن کۆمەڵگای نێودەوڵەتییەوە ئیدانە بکرێت.

وەزارەتی دەرەوەی سوریا داوایکردووە کە ئەمریکا قەرەبووی زیانەکانی ئەم داگیرکاری و دەسدرێژییە سەربازییە بۆ خەڵکی ئەم وڵاتە بکاتەوە.

بەیاننامەکە داوای لە وڵاتانی ئەندام لە ئەنجومەنی ئاسایشی نێودەوڵەتی کردووە کە لە بەرامبەر پێشێلکردنی یاسا نێودەوڵەتییەکان و تاڵانکردنی سەروەت و سامانی سوریاوە لە لایەن ئەمریکا پاڵپشتی لە گەلی ئەم وڵاتە بکەن./.