ئێران ڕێڕەوێکی بازرگانی گرنگە و هێرش بۆسەر ئەو وڵاتە، کاریگەری خراپ لەسەر ئابووری جیهان دروست دەکات

ڕوانگە - شارەزایەکی ئابووری جەخت لەسەر ئەوە دەکاتەوە کە ئێران ڕێڕەوێکی بازرگانی گرنگە بۆ زۆرێک لە وڵاتانی جیهان و هەرهێرشێک بۆسەر ئەو وڵاتە، کاریگەری خراپ لەسەر ئابووری جیهان دروست دەکات.

 

 

بیلال ڕەئوف ساڵەح، پسپۆڕی ئابووری سیاسی، بۆڕوانگە ڕایگەیاند:" بەهۆی ئەو هەڕەشانەی کە ئیسرائیل دەیانکاتەسەر وڵاتی  ئێران، پێویستە ئێمە چەند سینارۆیەک لەبەرچاو بگرین بۆنمونە: ئەگەر بێت و ئیسرائیل کێڵگە نەوتی و کۆگاکانی نەوت و گوێزەرەوەکانی نەوتی ئێران بکاتە ئامانج، ئەوا بێگومان نرخی نەوت لەسەر ئاستی جیهان بەرزبوونەوە تۆماردەکات، وەدواتریش کاردانەوەی ئێرانی بەدوادادێت، کە ئەگەری هەیە کێڵگە نەوتییەکان لە کەنداوی عەرەبیش ئەوانیش بر ئامانج بکەون،  واتا ئەگەر ئێران خۆی نەوت هەناردە نەکات لەوەیە ڕێگە نەدات وڵاتی دیکە لە کەنداو نەوت هەناردە بکات، بۆیە بە دڵنیاییەوە نرخی نەوت بەرزبوونەوەی زۆرباش تۆماردەکات کە ئەمەش کاریگەری دەبێت لەسەر بەرزبوونەوەی نرخی سووتەمەنی لە هەرێمی کوردستان، وەلەوەدەچێت تا ئاستێکیش کاریگەری دروست بکات لەسەر قەیرانی دروستکردنی دابینکردنی سووتەمەنی، کە ئەمە سینارۆی یەکەم بەم شێوازە مامەڵەی لەگەڵدا دەکرێت."

 

 

 

لەبارەی کاریگەری و مەترسییەکانی هەڕەشەکانی ئیسرائیل بۆ سەر ئێران و کاریگەرییان لەسەر بازاڕەکانی جیهان، بیلال ڕەئوف ساڵەح، پسپۆڕی ئابووری سیاسی،باسی لەوەکرد:" ئەگەر کێشە لە پاڵاوگەکانی نەوتی ئێران ڕووبدات، ئەوا بەرزبوونەوەی نرخی نەوت ڕوودەدات و بە پلەی یەکەم کاریگەری لەسەر وڵاتی چین و هندستان دروست دەکات، چونکە دوو کڕیاری سەرەکی نەوتی ئێرانن، هەم نەوتی داشکێنراوی ئێران هەم نەوتی قاچاخی ئێران، کە پێشبینی دەکرێت ڕۆژانە 1,500 یەک ملیۆن و نیو، هەناردەی نەوتی ئێران بێت چی بە فەرمی چی بە نافەرمی، کە بێگومان کارگەری دەکاتەسەر ئەو دوو گەورە ئابووریەی جیهان، هەروها هەرچەند ئێران پەیوەندییەکی بازرگانی وەهای لەگەڵ ئەمەریکادا نییە، بەڵام هەڵئاوسان لە ئەمەریکا زیاد دەکات، کە ئەوەش پێداچونەوە بە سیاسەتی نەختینەی ئەو وڵاتە دروست دەکات، هەموو ئەمانە دەکرێت کارگەرییان هەبێت  لەسەر بەهای دراوەکان  و نرخی کانزاکان لەجیهاندا، چونکە  ئەو ئێوارەی ئێران هێرشی کردەسەر ئیسرائیل بۆرسەی نیۆرک دابەزینی 1% ی تۆمارکرد، بۆیە ئەمانە شتێکی ئاسان نین بۆیە هەموو جیهان لە خەمی ئەوەدایە کە هەوڵبدرێت حەسرێکێ ئەم جەنگە بکرێت، یاخود وەڵامی ئیسرائیل سنورداربێت و وەڵامی ئێرانی بەدوادا نەیەت، هەربۆیە ئەمەریکا نایەوێت لە کێڵگە نەوتیەکان بدرێت، چونکە کاریگەری لەسەر ئابووری جیهان دەبێت، چونکە هاوشێوەی ئەو جەنگەی ڕووسیا و ئۆکرانیا دەبێت و بگرە خراپتریش، چونکە ئێستا ئابووری جیهان پێشووتر کۆمەڵێک نەخۆشیەوە دەیناڵاند، بۆنمونە کۆرۆنا، شەڕی ڕوسیا و ئۆکرانیا، بابەتی هەڵئاوسان لەسەر ئاستی جیهان، ئەمانە کۆمەڵێک نەخۆشین توشی ئابووری جیهان بوون.