سەرۆك کۆمار پێشوازی لە سەرۆکی دەستەی نیشتمانی بۆ وەبەرهێنان دەکات

ڕوانگە -سەرۆك کۆمار د.لەتیف جەمال رەشید پێشوازی لە د.حەیدەر محەمەد مەکیه سەرۆکی دەستەی نیشتمانی بۆ وەبەرهێنان کرد.

لەدیدارەکەدا، کە ئەمڕۆ چوارشەممە 16-10-2024 لە کۆشکی بەغداد بەڕێوەچو، دۆخی وەبەرهێنان لە عێراق و میکانیزمەکانی بەهێزکردنی متمانە بەژینگەی وەبەرهێنانی ناوخۆیی تاووتوێکرا و سەرۆك کۆمار جەختی لە پێویستی هەمەچەشنکردنی وەبەرهێنان لەپڕۆژە ستراتیژییەکان و پڕۆژەکانی ژێرخانی ئابوریدا کردەوە و داوای فراوانکردنی پلانەکانی وەبەرهێنان و برەودان بە کەرتی پیشەسازی و کشتوکاڵ و بەشداریکردن لەپەرەپێدانی ئابوری نیشتمانی لەڕێگەی هاریکاری لەگەڵ کۆمپانیا تایبەتمەند و بەناوبانگەکانی وەبەرهێنان کرد. هەروەها داوایکرد دەستەی وەبەرهێنان رۆڵێکی کاریگەری هەبێت لەپشتیوانیکردن و هاندانی کەرتی تایبەت و دانانی سیاسەتێکی ستراتیژی بۆ نیشتەجێبون، کە خەڵکی کەمدەرامەت لەبەرچاو بگرێت و لەگەڵ توانای کڕینیاندا بگونجێت.
لەلای خۆیەوە سەرۆکی دەستەی وەبەرهێنان، پلانەکانی داهاتووی دەستەکە و دەرفەتە بەردەستەکانی وەبەرهێنانی خستەڕو، هەروەها رێنماییەکانی سەرۆك کۆمار و تێڕوانینی بۆ بەهێزکردنی رۆڵ و باشترکردنی کاری دەستەکەیانی بەرزنرخاند.