کچەکەی عەلاوی زانیاری گرنگ لە سەر هەڵبژاردنەکانی عێراق ئاشکرا دەکات

کاندیدی هاوپەیمانی وەتەنیە لە هەڵبژاردنە پەرلەمانی عێراق وتی کە سیستەمی هەڵبژاردنەکانی ئەم وڵاتە پێشتریش بڕیار بووە لە وڵاتی ئەرجەنتین بەکار بهێندرێت بەڵام بە هۆی کێشە و گرفتەکانەوە، پەرلەمانی ئەرجەنتین دژایەتی خۆیی لە سەر ئەو پرسە دەربڕی.

سارە عەلاوی لە کاندیدەکانی پەرلەمانی عێراق و کچی ئەیاد عەلاوی سەرۆک وەزیرانی پێشووتری ئەم وڵاتە لە کۆنگرەیەکی ڕۆژنامەوانیدا وتی کە پاش هەڵبژاردنەکانی 2018، مستەفا کازمی باسی هاککردنی ئەنجامی دەنگدانەکەی کردبوو.

ناوبراو وتی: کازمی بە عەلاویی ڕاگەیاند کە شارەزایەکی تەکنیکی لە ماوەی 5 خولەکدا توانیویەتی ئەنجامی هەڵبژاردنەکان بگۆڕێت.

وتیشی کە کازمی ئەگەری هەمان کێشەی بۆ ئەم هەڵبژاردنانە دیسانەوە بە عەلاوی ڕاگەیاندووە.

کچەکەی عەلاوی وتی کە سیستەمی هەڵبژاردنەکانی عێراق بە هۆی کێشە و گرفتەکانەوە لە وڵاتی ئەرجەنتین ڕەتکراوەتەوە و هیچ وڵاتێک کار بەو سیستەمە ناکات./.